Pirates binawian ang Red Lions
MANILA, Philippines — Tuloy ang pamamayagpag ng Lyceum of the Philippines nang pataubin nito ang nagdedepensang San Beda University, 73-66 para matamis na ma-sweep ang first round ng NCAA Season 94 men’s basketball tournament kahapon sa The Arena sa San Juan City.
Minanduhan ni reigning MVP CJ Perez ang mainit na paglalayag ng Pirates nang humataw ito ng 22 puntos, 13 rebounds, tatlong assists at dalawang steals para pigilan ang mabangis na ariba ng Lions.
Malaki rin ang kontribusyon ni Jaycee Marcelino na nakalikom ng 13 puntos at apat na boards habang kumana si Spence Pretta ng 11 markers at tatlong rebounds para sa Lyceum na sumulong sa ikawalong sunod na panalo at manatiling walang bahid ang rekord nito.
“It’s about who we are playing for, we are not playing the competition but we are playing for ourselves. We know what San Beda could do and that it’s something that people are watching,” ani Pirates head coach Topex Robinson.
Nakatikim ng unang kabiguan ang Red Lions na bumagsak sa 6-1 baraha.
Nakakuha ang San Beda ng 19 puntos at 18 boards buhat kay Donald Tankoua samantalang naglista si Robert Bolick ng 18 points at 10 markers at 15 rebounds galing kay Javee Mocon.
Sa unang laro, namayani ang Colegio de San Juan de Letran sa Mapua University, 84-62 para makabalik sa porma bitbit ang 5-3 baraha.
- Latest
