Generals, Skippers maghihiwalay
MANILA, Philippines — Mag-uunahan ang Batangas at Marinerong Pilipino na makuha ang ikalawang panalo sa kanilang paghaharap ngayong hapon sa 2018 PBA D-League Foundation Cup sa Ynares Sports Arena sa Pasig City.
Magtutuos ang Generals at Skippers sa ala-una habang maghaharap sa ikalawang laro sa alas-3 ang Centro Escolar University at AMA Online Education.
Magkasalo sa No. 3 ang Batangas at Marinero hawak ang parehong 1-1 marka samantalang nangunguna ang Go For Gold na may malinis na 3-0 baraha kasunod ang Che’Lu na taglay ang 2-1 kartada.
Galing sa magkaibang resulta ang Generals at Skippers.
Ginulantang ng Batangas ang CEU, 96-90 para sumampa sa win column.
Kumuha ng lakas ang Generals kina Cedric De Joya, Clark Derige at Christian Manalo.
Ngunit madaragdagan pa ang puwersa ng Batangas dahil nasa tropa na si University of Santo Tomas shooter Clark Bautista.
Sa kabilang banda, hindi umubra ang lakas ng Marinero sa Ché’Lu para lasapin ang 71-88 kabiguan. (CCo)
- Latest
