BaliPure sosyo sa itaas
Laro sa Sabado(The Arena)
2pm Petro Gazz vs Iriga
4pm BanKo vs PayMaya
MANILA, Philippines — Isang malamig na 25-22, 25-22, 22-25, 32-30 desisyon ang ibinuhos ng BaliPure-National University laban sa BanKo-Perlas upang sumosyo sa liderato sa Premier Volleyball League Season 2 Reinforced Conference kagabi sa Filoil Flying V Center sa San Juan City.
Nakakuha ng dalawang krusyal na puntos ang Water Defenders mula kay open hitter Princess Robles para tuldukan ang paghahabol ng Perlas Spikers.
Inangkin ng BaliPure ang ikatlong panalo sa apat na laro para samahan sa unahan ng standings ang Creamline at PayMaya na may parehong 3-1 baraha.
Nakaporma na ang Perlas Spikers sa tangkang maipuwersa ang deciding fifth set matapos kapitan ang 16-14 kalamangan sa ikaapat na kanto.
Agad itong binura ng Water Defenders tampok ang solidong block ni reinforcement Janisa Johnson kay BanKo import Jutarat Montripila para maitabla ang laban sa 16-all.
Mula rito, 14 beses nagtabla ang laban na umabot sa 30-all.
Isang atake ni Robles ang lumusot sa depensa ng Perlas Spikers na sinundan nito ng ace para tuluyang kubrahin ng Water Defenders ang panalo.
Lalo pang nalugmok ang Perlas Spikers sa ilalim ng standings bitbit ang 1-4 marka.
Sa men’s division, iginupo ng Vice Co ang Instituto Estetico Manila, 28-30, 25-21, 25-23, 25-16 para umangat sa unahan.
- Latest