Mandaue mipatilaw'g pilde sa Danao

CEBU, Philippines — Gipakuratan sa Team Mandaue ang kanhi wa'y pildeng Danao, 70-56 aron pagpahayag sa ilang tsansa nga makasud sa quarterfinals ubos sa North Division Bracket 1 sa 2nd Cebu Governor's Cup Inter-Cities and Municipalities Under-21 Developmental Basketball Tournament didto sa Compostela Sports Complex niadtong Sabado.

Si Jun Wilmar Isok miposa og duha ka tres sa iyang otso puntos nga nagtuboy sa Mandaue ngadto sa 11 puntos nga labaw sa unang kuwarter, 27-16.

Miulbo ang tensiyon sa second half nga miresulta ngadto sa pagka-ejected sa duha ka players sa Danao nga sila si Rusty Aguilar ug Ralph Laurence Nadela.

Anugon kaayo ang pagsibat sa duha sa korte kay nakasikit na unta ang Danao ngadto na lang sa siyete puntos, 44-51 human sa tulo ka kuwarter. Sukad nga nawala  sila  si  Aguilar ug Nadela, wala na magkadimao ang opensa sa Danao hinungdan nga nalubong sila sa Mandaue og 14 puntos.

Gumikan sa maong kaparotan, kinahanglan nga ang Danao modaog batok sa 4-0 nga Consolacion sa ilang duwa nga padayong nagduwa sa pagsulat niining balita. Kun mapilde ang Danao, hayan nga sila matagak ug ang Mandaue maoy moabante sa quarterfinals.

Sila si Jared Michael Espina ug Hansel James Camacho maoy nangu sa Mandaue uban ang 12 puntos matag usa, samtang si Isok miamot og 11 puntos sa dihang ilang giinat ang ilang record ngadto sa 3-1. Si Argie Capul dunay 10 puntos sa 3-1 nga Danao. (BANAT NEWS)