Leyno wagi ng MOS sa HK meet
MANILA, Philippines — Nakasiguro pa ang Philippine Swimming League (PSL) tankers ng isang ginto at dalawang tansong medalya sa pagtatapos ng 2018 Stingrays Invitational Swimming Championships na ginanap sa Hong Kong International School swimming pool sa Tai Tam, Hong Kong.
Muling umariba si Christian Leyno nang mamayagpag ito sa boys’ 13-14 100m butterfly sa pamamagitan ng isang minuto at 2.72 segundo para angkinin ang kanyang ikalawang gintong medalya sa torneo.
Nauna nang kumana ng ginto si Leyno sa 200m butterfly matapos magtala ng dalawang minuto at 23.80 segundo sa unang araw ng kumpetisyon.
Nagdagdag pa ng tanso si Leyno sa 200m individual medley tangan ang dalawang minuto at 28.70 segundo gayundin sa 50m freestyle kung saan nagsumite ito ng 26.73 segundo.
Dahil sa kanyang dalawang ginto at dalawang tanso, itinanghal si Leyno bilang Most Outstanding Swimmer sa kanyang age-band.
Sa kabuuan, umani ang PSL ng dalawang ginto at tatlong tanso.
Nakuha ni Legazpi City pride Trump Christian Luistro ang isa pang tanso sa boys’ 10-12 200m butterfly matapos maglagak ng tatlong minuto at 10.11 segundo.
‘We’re proud of these young swimmers for putting up a good fight against strong tankers from the region. It’s a good exposure for them and we’re hoping to bring them in other part of the world to further hone their skills,” ani PSL president Susan Papa. (CCo)
- Latest
