Debut ni Balkman sa SMBeer sapaw sa Aces
Laro Ngayon(Smart Araneta Coliseum)
4:30 p.m. RoS vs Globalport
6:45 p.m. Ginebra vs Phoenix
MANILA, Philippines — Ipinarada man si import Renaldo Balkman ay hindi pa rin ito nakapigil sa kamalasan ng nagdedepensang San Miguel.
Isinalpak ni Vic Manuel ang isang floater sa pagtunog ng final buzzer para ipalasap ng Alaska Aces ang ikatlong sunod na kabiguan ng Beermen, 105-103 sa 2018 PBA Commissioner’s Cup kahapon sa Lamberto Macias Sports Complex sa Dumaguete City.
Ang ikaapat na panalo ng Alaska (4-1) ang lumikha ng three-way tie para sa liderato kasama ang Rain or Shine (4-1) at TNT Katropa (4-1).
Nalasap naman ng San Miguel ang kanilang pangatlong sunod na kamalasan sa kabila ng pagpaparada kay Balkman kapalit ni Troy Gillenwater.
Itinayo ng Aces ang 14-point lead, 57-43 sa halftime hanggang palobohin ito sa 72-50 mula sa three-point shot ni JVee Casio sa 6:40 minuto ng third period.
Ngunit isang 27-9 atake ang ginawa ng Beermen para makadikit sa 77-81 sa pagtatapos ng nasabing yugto patungo sa 103-103 pagtabla sa huling 52.9 segundo buhat sa drive ni Balkman.
- Latest
