F2 at Petron itatakda ang title series
MANILA, Philippines — Target ng nagdedepensang F2 Logistics at Petron na maisaayos ang kanilang paghaharap sa Finals sa paglarga ng Game Two ng kani-kanilang best-of-three semifinal series sa Philippine Superliga Grand Prix sa The Arena sa San Juan City.
Titipanin ng Cargo Movers ang two-time champion na Foton Tornadoes ngayong alas-4:15 ng hapon at makakalaban ng Blaze Spikers ang Cocolife sa alas-7 ng gabi.
Parehong nakauna ang F2 Logistics at Petron sa kanilang mga serye.
Itinarak ng Cargo Movers ang 25-22, 25-23, 22-25, 25-22 panalo laban sa Tornadoes noong Martes sa likod nina imports Kennedy Bryan at Mari Jose Perez.
Humataw si Bryan ng 12 attacks at tatlong blocks at nakalikom naman ng 14 markers ang reigning MVP na si Perez na nagawa nila sa tulong ni playmaker Kim Fajardo na may 31 excellent sets.
“Malakas talaga ang Foton. Nagtiwala lang kami sa game plan na inihanda namin for them. Hopefully mas maging maganda laro namin sa Game Two,” ani Fajardo.
Hindi sapat ang pagbabalik ni Jaja Santiago sa Foton para dalhin ang tropa sa panalo.
Nagpasabog ng 22 puntos si import Channon Thompson at 15 galling kay Elizabeth Wendel.
Mayroon ring 10 markers si Santiago at siyam naman buhat kay Dindin Manabat.
- Latest
