Spurs lumakas ang tsansa sa playoff spot
SAN ANTONIO — Umiskor si center LaMarcus Aldridge ng 28 points para akayin ang Spurs sa 116-105 panalo laban sa Portland Trail Blazers.
Tinapos ng San Antonio (46-34) ang isang two-game losing skid para makatabla sa Oklahoma City Thunder at New Orleans Pelicans sa fifth place sa Western Conference sa ilalim ng Utah Jazz.
Maaaring kunin ng Spurs ang playoff spot kung mananalo sa Sacramento Kings sa Lunes.
Nag-ambag naman si veteran guard Manu Ginobili ng 17 points para sa San Antonio mula sa kanyang perpektong 7-for-7 fieldgoal shooting.
Ang back-to-back three-point shots at right-handed layup ni Ginobili ang nagbigay sa Spurs ng 101-89 bentahe sa Trail Blazers.
Nalasap naman ng Portland (48-32) ang kanilang ikatlong sunod na kabiguan at napakawalan ang tsansang makamit ang home-court advantage sa first round.
Kumamada si Damian Lillard ng 33 points para sa Trail Blazers kasunod ang 18 markers ni Evan Turner.
Nagdagdag si C.J. McCollum ng 17 points.
Sa New York, naglista si guard Eric Bledsoe ng 22 points at 10 assists at lumapit ang Milwaukee Bucks sa pagtabla sa sixth place sa Eastern Conference mula sa 115-102 panalo laban sa Knicks.
Umiskor din si Khris Middleton ng 22 points para sa Bucks, nakasama ang Miami Heat sa parehong 43-37 record.
Naglaro ang Milwaukee na wala si All-Star Giannis Antetokounmpo na may sore right ankle.
Tumipa naman si Jarrett Jack ng 18 points at humakot si Kyle O’Quinn ng 15 points, 16 rebounds at 5 assists sa panig ng New York, tinalo ang Miami, 122-98, noong Biyernes.
- Latest
