Bustamante, Pagulayan ikinasa ang all-Pinoy Finals

MANILA, Philippines — Naisaayos nina dating world champions Francisco Bustamante at Alex Pagulayan ang all-Filipino championship showdown sa 2018 Scotty Townsend Memorial One-Pocket Tournament na ginaganap sa Arena Billiards West Monroe sa Los Angeles, California.

Nairehistro ni Bustamante ang pahirapang 4-3 panalo laban kay Pagulayan sa semifinals ng winners’ column dahilan para mahulog ang huli sa losers’ bracket.

Ngunit nakabawi si 2004 World 9-Ball Championship titlist Pagulayan sa one-loss side kung saan pinatumba nito si Tony Chohan ng Amerika sa bendisyon ng impresibong 4-0 desisyon sa semifinals ng losers’ bracket upang masungkit ang huling tiket sa finals.

Lalaruin ngayong araw ang finals na isang race-to-six format kung saan ang magkakampeon ay tatanggap ng $10,000 habang magkakasya ang runner-up sa $6,000 konsolasyon.

Ito ang ikalawang all-Filipino finals sa 2018 Scotty Townsend Memorial Tournament.

Nasungkit ni Zoren James Aranas ang kam­peonato sa 9-Ball event kung saan tinalo nito si Pa­gulayan sa championship round sa iskor na 9-8.

Umaasa si Pagulayan na matuldukan ang kanyang pagkauhaw sa titulo sa taong ito habang nais ni Bustamante na makuha ang ikatlong korona sa taong ito matapos pagharian ang Derby City Classic Master of the Table at Derby City Classic One-Pocket Division noong Enero sa Elizabeth, Indiana sa Amerika.