Cebuano triathletes manulong sa Davao alang sa 1st Alaska Ironkids
CEBU, Philippines — Usa ka pundok sa mga batan-ong triathletes sa Sugbo ang mopakita’g aksiyon sa labing unang Alaska Ironkids didto sa dakbayan sa Davao karong adlawa.
Sagad sa mga Sugboanon sa maong lumba nagagikan sa Talisay Luigi Triathlon Group ni coach Rolando Remolino diin aduna kini 13 ka miyembro ubos sa pagpangu nilang Moira Frances Erediano ug Nicole Marie del Rosario.
Lain pang mga pambato ni Remolino mao sila si Mathew Justine Hermosa, Jeanna Mariel ug Jason Christopher Cañete, Kenchie Luke Cabando, Dave Zachary Fernandez, Brent Diesmo, Euwon ug Tenchie Semilla, Earol ug Rheciel Belonguil ug Fresh Lorraine Seguerra.
Samtang ang laing koponan gikan sa Sugbo mao ang Omega Junior Team nga mipadala lamang og duha niini ka sakop nga sila si Ivan Delica ug Marielle Estreba.
Ang Davao leg maoy una sa duha lamang ka Alaska Ironkids nga nakalinya sa Sunrise Events karong tuiga.
Ang ikaduha ug final leg gikatakda karong Agosto 4 sa dakbayan sa Lapu-Lapu.
- Latest