CELBA Summer League 2018 sugdan na

CEBU, Philippines — Ang exhibition game  sa hiniusang puwersa sa CELBA officers ug team managers/owners batok sa Barangay RT squad, maoy mobukas sa  Cebu Legends Basketball Association Summer League 2018 karong gabii alas 6:30 sa gabii diha sa Canduman Housing gym, dakbayan sa Mandaue.

Dose na ka teams ang mosalmot ning ikatulong season sa CELBA pangulohan sa two-time defending champions AC Troopers ni S/Insp. Dondon Coloscos.

Sa 12 ka teams, tulo niini ang bag-o nga naglakip sa Explorer ni Alan Buenavista, SRP Sunday 

Club ubos sa pagdumala ni Rom Castañeda ug Krizia RM-EM ni Arthur Lelis.

Laing walo nga moapil mao ang team Lisen ni Gilbert Lisen, SIBA Tigers ni Jennifer Velasco, Monterroyo ni Dr.  Raul Monterroyo, Alcover ni Tony Alcover, Sebandal ni Gilbert Sebandal, Villaflores-

Marbalo nilang Jerome Villaflores ug Mar Balo, Quiñahan-Ermac nilang Eboy Quiñahan ug Roy Ermac ug

Sante Barley ni Freddie Cabiluna.

Magsangka sila ubos sa single round robin format diin barangayan system ang gamiton aron paghatag og kahigayonan nga makaduwa ang tanan.

Walo ka teams ang moabante sa playoffs diin ang top 2 makaangkon  og ‘twice-to-beat’ advantage. Ang no. 1 moharong sa no. 8, ang no. 2 mosangka sa no. 7,  no. 3 batok no. 6 ug no. 4 batok no. 5. Ang modaog  maoy moduwa sa crossover semifinals diin ang   mga  mananaog  maoy  mag-abot sa finals, samtang ang mangapilde moduwa alang sa ikatulong dapit.

Ang game proper liwas na sa Semana Santa.

Gawas sa exhibition game, himuon sab ang paghurar sa mga bag-ong opisyales sa CELBA ug salo-salo dinuyogan sa live band.

Manumpa sa ilang katungdanan karon mao  ang founder ug interim  president nga si S/Insp. 

Dondon Coloscos, incoming president Gilbert Lisen ug vice president Engr. Tony Alcover uban nilang  

Jennifer Velasco (secretary), Jerome Villaflores (treasurer) ug mga technical committee nga gilangkuban nilang Ramel Baclay, Wendel Oquias, Engr. Roel Tayag, Titi Medillo, Lloyd Chavez ug Richard Limosnero.