Bustamante, Pagulayan sa semis na

MANILA, Philippines — Tuloy ang matikas na pagtumbok nina dating world champions Francisco Bustamante at Alex Pagulayan upang umabante sa semifinals ng 2018 Scotty Townsend Memorial One-Pocket Tournament na ginaganap sa Arena Billiards West Monroe sa Los Angeles, California.

Iginupo ni 2010 World 9-Ball Championship winner Bustamante si Danny Smith sa bisa ng 4-2 panalo habang namayani naman si 2004 World 9-Ball Championship titlist Pagulayan laban kay Tony Chohan sa hiwalay na laban sa pamamagitan ng 4-1 desisyon.

Maghaharap sina Bustamante at Pagulayan sa semifinals ng winners’ column kung saan ang magwawagi ang unang makasusungkit ng tiket sa championship round.

Ang matatalo naman ay malalaglag sa one-loss side kung saan kailangan nitong maipanalo ang kanyang mga susunod na laban kabilang na ang krusyal na losers’ bracket semifinal stage.

Sa kabilang banda, nagtala si 2006 World 9-Ball champion Ronnie Alcano ng dalawang sunod na panalo sa losers’ column upang manatiling buhay ang pag-asa nito sa US Open Bank Pool Championships na ginaganap naman sa Griffs Hall sa Las Vegas, Nevada.

Pinataob ni Alcano si Harry Platis sa iskor na 4-3 kasunod ang pagpapa­talsik sa kababayang si Warren Kiamco sa pamamagitan ng parehong 4-3 panalo.