Rockets pinigil ang Blazers

PORTLAND -- Tinapos ng league-leading Houston Rockets ang 13-game NBA winning streak ng Trail Bla­zers sa pamamagitan ng 115-111 road victory.

Kumamada si Most Valuable Player candidate James Harden ng 42 points para tulungan ang Rockets na itala ang kanilang ika-13  panalo sa huli nilang 14  laro matapos ang All-Star break.

Ang step-back three-pointer ni Harden ang nagbigay sa Houston ng 113-104 bentahe sa huling 1:55 minuto ng fourth period bago ito naputol ng Portland sa dalawang puntos sa natitirang minuto.

“They've been playing well, we all know that,” sabi ni Harden. “Nothing changes for us, no matter who we play. We go out there and just do our thing on both ends of the floor. Tonight was no different.”

Pinamunuan ni forward Al-Farouq Aminu ang Trail Blazers sa kanyang 22 points, isa sa limang Portland players na umiskor sa double figures.

Nagdagdag si Jusuf Nurkic ng 21 points kasunod ang 20 markers ni Damian Lillard para sa Portland, nanatiling nasa ibabaw ng Oklahoma City Thunder para sa third place sa Western Conference.

Tinalo ng Boston Celtics ang Thunder, 100-99 kung saan nagsalpak si Marcus Morris ng triple sa natitirang 1.2 segundo ng laro.

Hindi naglaro si Cel­tics star Kyrie Irving dahil sa sore left knee, ngunit nagtala ang pumalit sa kanyang si Jayson Tatum ng 23 points at 11 rebounds.

Nag-ambag si Morris ng 21 points para sa Boston, winakasan ang six-game winning streak ng Oklahoma City.

“They came in here with their full squad and they thought it was going to be a cakewalk,”  wika ni Morris.

Umiskor si Russell Westbrook ng 27 points bukod pa ang 8 rebounds at 7- assists sa panig ng Thunder.

Sa Orlando, binura ng Eastern Conference lea­ding Toronto Raptors ang eight-point fourth quarter deficit para talunin ang Magic, 93-86.

Hindi naglaro si star DeMar DeRozan dahil sa left thigh contusion para sa Raptors, nakahugot kay Kyle Lowry ng game-high 25 points, 5 rebounds at 8 assists.