Aranas kampeon sa Scotty Townsend Memorial 9-Ball

MANILA, Philippines — Patuloy ang matikas na kampanya ng Pinoy cue masters sa international scene nang angkinin ni Zoren James Aranas ang kampeonato sa 2018 Scotty Townsend Memorial 9-Ball Tournament na ginaganap sa Arena Billiards West Monroe sa Los Angeles, California.

Naitala ng 25-anyos na si Aranas ang gitgitang 9-8 sorpresang panalo laban kay 2004 World 9-Ball Championship winner Alex Pagulayan sa All-Filipino championship showdown upang masungkit ang korona.

Napasakamay ni Aranas ang $7,500  premyo habang nagkasya naman si Pagulayan sa $5,625 konsolasyon.

Nakahirit ng tiket sa finals si Aranas matapos walisin ang lahat ng kanyang laro sa eliminasyon sa torneong nagpatupad ng double-elimination format.

Dahil sa kanyang elimination sweep, nabiyayaan ng twice-to-beat card si Aranas kung saan isang panalo na lamang ang kinailangan nito para makuha ang titulo.

Kabilang din sa mga pinabagsak ni Aranas sina Tim Cook sa first round, legendary cue master Francisco Bustamante sa second round, Christian Young sa third round, John Hennessee sa fourth round, Alex Olinger sa fifth round at Robb Saez sa sixth round.

Tinalo rin ni Aranas si Pagulayan sa semifinals ng winners’ column dahilan upang mahulog ang huli sa losers’ bracket.

Sa kabilang banda, nakabawi si Pagulayan nang patumbahin nito si Danny Smith sa semifinals ng lo­sers’ bracket para maisaayos ang muling pakikipagtipan kay Aranas.

Subalit kinatigan ng suwerte si Aranas sa huling bahagi ng laban para angkinin ang unang puwesto.

Ito ang ikalawang titulo ni Aranas sa taong ito matapos pagharian ang 2018 Music City Classic Open Division noong Enero sa Madison, Tennessee sa Amerika.