Kiamco kampeon sa AAMM 9-Ball Classic

MANILA, Philippines — Nasungkit ni Warren Kiamco ang kanyang u­nang korona sa taong ito matapos pagharian ang 28th Annual Andy Mercer Memorial 9-Ball Classic na ginanap sa Rum Runner Lounge sa Las Vegas, Nevada.

Dalawang beses tinalo ni Kiamco si five-time champion Shane Van Boening ng Amerika sa finals upang matamis na angkinin ang $5,000 premyo.

Naitala ni Kiamco ang 6-3 panalo sa Game 1 kasunod ang pagtarak ng 6-4 desisyon sa Game 2 laban kay Van Boening.

Nagkasya lamang sa $2,500 konsolasyon si Van Boening.

Umusad sa finals si Kiamco matapos magtala ng krusyal na panalo sa losers’ bracket.

Nagtala muna si K­iamco ng panalo laban kina Pinoy cue master Ronnie Alcano sa first round (6-2), Oscar Dominguez sa second round (6-3) at Kings Santy sa third round (6-1) sa winners’ column.

Subalit nalaglag sa lo­sers’ bracket si Kiamco matapos yumuko kay Van Boening sa fourth round (1-6).

Mas naging agresibo si Kiamco sa losers’ bracket kung saan isa-isa nitong pinabagsak sina Ernesto Dominguez (6-1), Gary Onomura (6-0), David Datillo (6-1), Brian Parks (6-0) at Mitch Ellerman (6-5) para maisaayos ang muling pakikipaglaban kay Van Boening sa finals.

Ito ang unang titulo ni Kiamco sa taong ito.

Nagkasya lamang si K­iamco sa runner-up honors sa 2018 Virginia State 10-Ball Championship noong Pebrero sa Virginia, US.