Tinagsip sa NBA

Durant nayayay ang gusok

CEBU, Philippines — Mitaas ang listahan sa mga batos sa Golden State Warriors nga na-injured human nayayay ang gusok ni Kevin Durant  hinungdan nga dili kini makaduwa sud sa duha ka semana. Si Durant nga maoy ikaunom nga leading scorers sa NBA karon nga season uban sa average niyang 26.6 puntos matag duwa, mitug-an ngadto sa mga tigbalita nga duna na siya’y dili maayong gibati sa iyang gusok atol sa ilang kaparotan ngadto sa Minnesota Timberwolves niadtong Lunes.  Apan niadto lamang Huwebes atol sa ilang sangka batok sa LA Lakers nga nakabatyag siya nga mura’g dunay nainat sa iyang gusok ug gibati siya og tumang kasakit hinungdan nga napugos siya pagpaubos sa eksaminasyon. Didto natino nga duna gyud diay siya’y gihambin nga injury.

Doc Rivers gipamulta $15T

Gihulagway ni LA Clippers coach Doc Rivers nga kataw-anan ang officiating atol sa ilang 101-96 nga kapildihan ngadto sa Houston Rockets, apan ang liga wala mahimuot niini hinungdan nga gipamulta siya og $15,000. Krusyal kaayo ang maong kaparotan gumikan kay nakapahanap kini sa tsansa sa Clippers nga makasud sa playoffs. Miulbo og samot ang kaspa ni Rivers gumikan sa iyang tan-aw nga dili patas nga tawag sa mga reperi. Apan wala malipay ang NBA sa iyang mga birada hinungdan nga gisilotan dayon siya.