Biado bandera sa world rankings ng WPBA
MANILA, Philippines — Nangunguna na si World 9-Ball champion Carlo Biado sa world ranking na inilabas ng World Pool-Billiard Association.
Nakalikom si Biado ng kabuuang 22,525 puntos tampok ang 9,900 puntos na nakuha nito sa pagkopo ng kampeonato sa World 9-Ball Championship na ginanap noong Disyembre sa Doha, Qatar.
Umani rin ang Pinoy cue master ng 4,325 points sa 2017 China Open, 3,050 points sa Guri International Championship, 1,950 points sa US Open, 1,200 points sa World Pool Series (second leg), 1,200 points sa All-Japan Championship, 400 points sa World Pool Series (first leg), at 200 points sa World Pool Series (finale).
Nasa ika-10 naman si Roland Garcia na may nairehistrong 13,912 points.
Si Garcia ang tinalo ni Biado sa finals ng World 9-Ball kung saan nakasiguro ito ng 8,250 points sa kaniyang runner-up finish.
Pasok naman sa ika-12 si Jeffrey De Luna na may 13,587 points habang ika-13 si Johann Chua na may 13,349 points at ika-20 si Jeffrey Ignacio na may 10,375 points.
Ang iba pang Pinoy sa world ranking ay sina Warren Kiamco sa 35th (6,175), Lee Vann Corteza sa 55th (4,300), Jundel Mazon sa 61st (3,900), Dennis Orcollo sa 76th (2,850) at Francisco Felicilda sa 81st (2,475).
Sa women’s division, inokupahan ni two-time world champion Rubilen Amit ang ikaapat na puwesto tangan ang 12,336 points (4,900 sa Guri International, 3,276 sa China Open, 2,400 sa World 9-Ball Championship, at 1,360 sa Amway eSpring International Championship).
Nasa ikapito si Back-to-back Southeast Asian Games gold medalist Chezka Centeno bitbit ang 10,880 mula sa 4,180 sa China Open, 3,100 sa World 9-Ball Championship, at tig-1,800 sa Guri International at Amway eSpring International Championship.
- Latest