Bronze medal para kay Watanabe
MANILA, Philippines — Nakasungkit ng tansong medalya si Filipino-Japanese Kiyomi Watanabe sa prestihiyosong 2018 International Judo Federation (IJF) Grand Slam na ginanap sa ISS Dome sa Dusseldorf, Germany.
Nakuha ni Watanabe ang tanso sa repechage stage kung saan niya pinasuko si 2008 Beijing Olympics bronze medalist Ketleyn Quadros ng Brazil sa kanilang laban sa women’s 63-kilogram division.
“(Watanabe) threw Quadros for a waza-ari with a sumi-gaeshi and put pressure on the Brazilian on the ground as the Beijing 2008 Olympic bronze medalist tapped out after picking up a knew injury,” ayon sa ulat ng IJF.
“Watanabe remains her country’s only Grand Slam medalist and a source of inspiration for the Philippines’ budding judoka,” dagdag pa ng report.
Nauna nang nagtala si Watanabe ng dalawang sunod na panalo sa Pool D laban kina Lucy Renshall ng Great Britain sa first round at Maelle Di Cintio ng France sa second round.
Ngunit yumuko si Watanabe kay Gankhaich Bold ng Mongolia sa third round at nahulog sa repechage stage.
Mas naging agresibo si Watanabe sa repechage nang pataubin si Prisca Awiti ng Mexico kasunod ang pagpapasuko kay Quadros para masiguro ang tanso.
“We’re happy with her achievement. It’s a big boost for Kiyomi as she wants to earn more points to improve her placing in the IJF world rankings. We would like to thank the Philippine Judo Federation and the Philippine Sports Commission for always supporting her,” wika ni Irene Watanabe, ang ina ni Kiyomi.
Bago sumabak sa Grand Slam Dusselfdorf ay nagmula si Watanabe sa training camp sa Paris, France kung saan niya nakasama si 2016 Rio Olympics gold medalist Tina Trstenjak ng Slovenia.
Noong nakaraang taon ay nakasungkit ang 21-anyos na judoka ng limang medalya sa iba’t ibang torneo.
Nakasikwat si Watanabe ng gintong medalya sa Asian Open Women's Judo Championship sa Taiwan noong Hulyo, pilak sa European Open Women's Judo Championship sa Austria noong Pebrero at tanso sa 2017 World Judo Tour - Paris Grand Slam sa France sa nasabi ring buwan.
- Latest
