Beermen matatag na sa No. 1
Dinepensahan ni Mark Yee ng Kia si Arwind Santos ng San Miguel. (Ernie Peñaredondo)
MANILA, Philippines — Inaasahan nang madaling maibubulsa ng nagdedepensang San Miguel ang una sa dalawang ‘twice-to-beat’ ticket sa quarterfinal round ng 2018 PBA Philippine Cup.
Ngunit nagkamali si head coach Leo Austria.
Muntik masayang ang itinayong 26-point lead ng Beermen sa third period kundi lamang naisalpak ni Marcio Lassiter ang isang undergoal stab sa huling 0.5 segundo para lusutan ang sibak nang Kia Picanto, 108-106 kahapon sa Smart Araneta Coliseum.
Ipinoste ng San Miguel ang 89-63 kalamangan mula sa basket ni Arwind Santos sa huling 2:31 minuto ng third quarter.
Ngunit hindi bumitaw ang Kia, nalasap ang ikaanim na sunod na kamalasan, nang agawin ang 106-103 bentahe mula sa layup ni Glen Khobuntin sa nalalabing 1:02 minuto ng final canto.
Itinabla ni Lassiter ang Beermen sa 106-106 mula sa kanyang three-point shot sa huling 47.5 kasunod ang mga mintis ng Picanto na nagbigay ng posesyon sa three-time PBA All-Filipino Cup champions sa nalalabing 1.8 segundo.
Ang inbound pass ni Chris Ross ang nagresulta sa basket ni Lassiter sa huling 0.5 segundo ang tuluyan nang nagtakas sa San Miguel para upuan ang No. 1 berth sa eight-team quarterfinals.
(Russell Cadayona)
SAN MIGUEL 108 - Santos 27, Lassiter 22, Pessumal 11, De Ocampo 10, Heruela 9, Ross 9, Espinas 8, Vigil 5, Ganuelas-Rosser 5, Mamaril 2, Agovida 0, Lanete 0, Semerad 0.
KIA 106 - Khobuntin 15, Corpuz 12, Gabriel 10, McCarthy 10, Yee 10, Cabrera 9, Celda 8, Camson 8, Tubid 7, Ababou 6, Jamon 5, Escoto 4, Lastimosa 2, Sara 0, Galanza 0.
Quarter scores: 29-23, 61-41, 91-71, 108-106.
- Latest
