Gilas maraming natutunan sa kabiguan sa Aussies

MANILA, Philippines — Sa 68-84 pagyukod sa Australia noong Huwebes sa Melbourne ay nagsalpak ang Gilas Pilipinas ng malamyang 7-of-19 shooting sa free throw line kumpara sa 25-of-32 clip ng No. 1 team sa Asya sa second window ng 2019 FIBA World Cup Asian Qualifiers.

Nagdomina din ang mga Boomers sa reboun­ding department sa hinakot na 50 boards kumpara sa 30 ng Nationals.

“We’re upset and disappointed that we lost but we’re happy we learned a lot from this ball game just playing the kind of quality of players Australia has, the 40-minute pressure, handling the pressure, handling the physicality,” sabi ni national head coach Chot Reyes.

Nalasap ng Gilas Pilipinas ang unang kabiguan matapos patumbahin ang Japan, 77-71 sa Tokyo at talunin ang Taiwan, 90-83  sa Smart Araneta Coliseum noong Nobyembre sa first window.

Dahil sa kanilang ikatlong sunod na panalo ay nasolo naman ng Australia ang liderato sa Group C kasunod ang Gilas Pilipinas (2-1), Chinese-Taipei (1-2) at Japan (0-3).

Pinataob ng mga Taiwanese ang Japanese team, 70-69.

Inaasahang babangon ang Gilas Pilipinas sa pagsagupa sa Japan bukas ng alas-7:30 ng gabi sa Mall of Asia Arena sa Pasay City.

“As much as we want to go all out for the victory, we also have to make sure managing minutes because we know we have to have fresh legs when we play Japan,” wika ni Reyes.

“They’re coming from Tokyo which is just a three-hour trip. Good thing, we’re going play at home and we could get adrenalin from the home crowd,” dagdag pa ng bench tactician.

Ang top three teams matapos ang double-round home-and-away series ang aabante sa susunod na round.

Pitong koponan ang kukunin bilang kinatawan ng Asya para sa 2019 FIBA World Cup na pamamahalaan ng China.