Vargas, Tolentino pinayagan na

MANILA, Philippines — Inaasahan ang mainit na pagtatagpo sa kampo ni POC president Jose Cojuangco at sa mga kaalyado ni Ricky Vargas ng boxing sa isasagawang special Philippine Olympic Committee election ngayon sa Wack Wack Golf and Country Club sa Mandaluyong City.

Sa nasabing special election ay pagbobotohan ang nabakanteng posisyon sa presidente at chairman ng mahigit 43 voting members alinsunod sa kautusan ni Pasig City Regional Trial Court Branch 155 presi­ding Judge Maria Gracia Cadiz-Casaclang noong Disyembre.

Matapos madiskwalipika sina Vargas at Tolentino dahil sa ginawang requirment ng POC Comelec na “active member,” dumulog sina Vargas at Tolentino sa korte kung saan pinawalang bisa ni Judge Cadiz-Casaclang ang ginawang election noong Nob. 25, 2016 sa mga nasabing posisyon at nag-utos ng special election sa Pebrero 23 (ngayon).

Humingi rin ng Temporary Restraining Order (TRO) ang kampo ni Cojuangco sa Court of Appeals ngunit tinanggihan ito noong Enero 30, kaya tuloy ang eleksyon ng POC.

Dahil  bigo sa Court of Appeals, dumulog din si Cojuangco sa International Olympic Committee kung saan pinayuhan sila na magsagawa ng extraordinary general assembly para desisyunan ang kinakaharap na problema.

Sa  isinagawang extra­ordinary general assembly meeting noong Lunes, ipinaubaya ng POC sa pamumuno ng 83-anyos na si Cojuangco ang special election sa binuong POC Comelec sa pangu­nguna ni dating IOC representative Frank Elizalde, Bro, Bernie Oca ng De La Salle at POC lawyer Alberto Agra.

Makaraan ang itinak­dang deadline sa filling ng protesta kahapon, nag­labas na ng  Omnibus Ru­ling Resolution ang POC Comelec kahapon ng hapon at pinayagan sina Vargas at Tolentino na tumakbo sa posisyong presidente at chairman, ayon sa pagkakasunod base sa utos ni Judge Cadiz-Masaclang.

Sa kabilang panig, pinayagan din si Ting Le­desma ng table tennis na tumakbo sa posisyon ng chairman sa partido ni Cojuangco laban kay To­lentino.