Eze gumana sa Altas
Laro sa Lunes (JCSGO Gym, Cubao, Quezon City)
2 p.m. Gamboa Coffee vs Perpetual Help Altas
4 p.m. JRU vs Wang’s-Letran
MANILA, Philippines — Matapos matalo sa huling laro, bumawi agad ang University of Perpetual Help Altas sa pamamagitan ng 82-75 panalo laban sa Batangas-EAC kahapon sa pagpapatuloy ng 2018 PBA D-League Aspirant’s Cup sa Ynares Sports Arena sa Pasig City.
Kahit ang Nigerian na si Prince Eze ay bumawi rin sa kanilang 69-81 pagkatalo sa Go For Gold noong Pebrero 13, bumida ito ng 24 puntos na may kasamang 15 rebounds at walong blocks shot upang ihatid ang pangalawang panalo ng tropa ni coach Frankie Lim sa apat na laro.
Bunga ng panalo, umangat ang Altas sa pang-walong puwesto habang ang Batangas ay lalong nahulog sa ilalim ng standings sa 1-5 win-loss kartada.
Bukod kay Eze, humakot din si Kim Aurin ng 22 puntos habang 16 naman mula kay Edgar Charcos na may kasamang pitong rebounds at limang assists para sa Altas.
“Nag-focus kami sa complete denial on defense. Kailangan walang bola ang kalaban mo at maganda naman ang naging denial sa game,” sabi ni coach Lim.
Sa pagbandera nina Eze, Aurin at Charcos, umabot pa sa malaking 16 puntos ang kalamangan ng Perpetual Help sa 70-54 mahigit anim na minuto na lamang ang natitira sa laro at hindi na pinakawalan pa ng Altas ang kanilang bentahe tungo sa panalo.
- Latest
