Heather MOS, Mojdeh umukit ng bagong PH record sa Middle East Open swim meet
MANILA, Philippines — Bumasag ng Philippine record si Micaela Jasmine Mojdeh habang nasungkit ni Heather White ang Most Outstanding Swimmer award sa kanyang dibisyon sa pagtatapos ng 2018 Middle East Open Swimming Championship na ginanap sa Hamdan Sports Complex sa Dubai, United Arab Emirates.
Nagrehistro ang Immaculate Heart of Mary College-Parañaque standout na si Mojdeh ng dalawang minuto at 25.82 segundo sa girls’ 12-over open division 200m butterfly upang burahin ang girls’ 13-year national junior record ni Regina Castrillo na 2:26.18 na naitala noong 2013.
“Mojdeh was entered in open event and not in her age category. She competed against older foes including an 18-year-old swimmer. But she showed her full potential and broke Philippine record here. All eyes are on her in every event. They even described her as an amazing swimmer,” ani Philippine Swimming League President Susan Papa.
Nakipagsabayan si Mojdeh laban kina 18-anyos Yasmine Alemeddine ng Pakistan na nagtala ng 2:24.49 at 13-anyos Lia Csulak ng Kuwait na may 2:25.48.
“It was such a hair raising moment for us. We are still in awe of how amazing of a swimmer she has become. We would like to thank coach Susan Papa for really pushing her and Doc Susan Benasa for motivating her to maintain her focus in the most stressful moment of her life,” wika ni Joan Melissa Mojdeh, ang ina ni Micaela Jasmine.
Sa huling araw ng kumpetisyon, nagdagdag pa ng isang ginto at dalawang pilak si White upang makuha ang MOS award sa girls’ 11-year juniors division.
Pinagreynahan ni White ang 50m freestyle sa bilis na 30.67 segundo para payukuin sina silver medalist Tiffany Murillo ng Dharan Youth Swim League (31.42) at bronze medalist Aditi Boopalakrishnan ng Nautilus Muscat Oman (34.00).
Humirit din ng pilak si White sa 200m Individual Medley (2:53.45) at 50m breaststroke (42.31).
Sa kabuuan, uuwi ang PSL squad tangan ang tumataginting na walong ginto, limang pilak at isang tansong medalya.
- Latest