3 malalaking tournament nakalinya agad sa PSL
MANILA, Philippines — Bubuksan ng Philippine Swimming League (PSL) ang 2018 season sa pagtataguyod ng tatlong malalaking torneo sa Luzon, Visayas at Mindanao.
Unang darayo ang PSL sa Visayas kung saan itatanghal ang 128th PSL National Series Long Course Swimming Meet sa Enero 14 sa Villareal Stadium Swimming Pool sa Roxas City.
Sunod na aarangkada ang asosasyon sa Luzon sa gaganaping 129th PSL National Series Long Course Swimming Championship para sa Class AB, C at Motivational Category sa Enero 20 sa Rizal Memorial Sports Complex sa Manila.
Lalarga naman ang kumpetisyon sa Mindanao tampok ang 130th PSL National Series sa Enero 28 sa Dipolog Sports Complex sa Olingan Dipolog City sa Zamboanga Del Norte.
“We have a lot of local and international competitions this year and as early as now, we want to select swimmers for those competitions. We are opening the doors in different parts of the country to give them a chance to be part of the PSL team,” wika ni PSL President Susan Papa.
Ang lahat ng tatlong torneo ay magsisilbing qualifying event para sa 2019 Summer World University Games sa Naples, Italy gayundin sa iba’t ibang international tournaments na lalahukan ng PSL sa susunod na taon.
“Apart from our international competitions, the Philippine Swimming League is also preparing for the Summer World University Games to be held next year in Italy. It’s one of our focus this year - to name swimmers for Universiade,” dagdag ni Papa.
Kabilang sa mga international meets ng PSL ang Buccaneer Swimming Championship sa Tokyo, Japan; Indian Ocean All-Star Challenge sa Perth, Australia; Thanyapura Swimming Championship sa Phuket, Thailand at Hamilton Aquatics Swimming Championship sa Dubai, United Arab Emirates.
Darayo rin ang PSL sa Amerika para sa 2018 Bolles Swimming Championship sa Pebrero sa Miami, Florida gayundin sa China, India, Canada, Greece, Turkey, Singapore, Hong Kong, Italy at Brazil.
- Latest
