2017 PBA yearender: 42 season dominado ng SMC
Nabahiran din ng kontrobersya
MANILA, Philippines — Bihira sa isang koponan ang makakuha ng dalawang kampeonato sa Philippine Basketball Association.
Lalung-lalo na ang tatlong sunod na korona para sa tinatawag na PBA Grand Slam.
Nagawa ito ng San Miguel, sa paggiya ni head coach Norman Black, noong 1989 at muntik nang maduplika ni mentor Leo Austria para sa Beermen sa nakaraang 42nd Season ng PBA.
Matapos angkinin ng San Miguel ang mga titulo ng 2017 PBA Philippine Cup at PBA Commissio–ner's Cup ay inabangan ang kanilang magiging kampanya sa PBA Governor's Cup.
Ang nasabing season-ending conference ay pinagharian ng Barangay Ginebra noong 2016 sa likod ni import Justin Brownlee laban sa Meralco.
Ngunit sa kanilang paghaharap sa quarterfinals kung saan nagbitbit ang Gin Kings ng 'twice-to-beat' advantage bilang No. 3 team ay nakalasap ang Beermen ng 84-104 kabiguan.
Ito ang tuluyan nang nagpaguho sa tsansa ng San Miguel para sa inaasam na ikalawang PBA Grand Slam.
Aminado si Austria na naging kampante ang kanyang mga Beermen matapos pagharian ang 2017 PBA Philippine Cup at PBA Commissioner's Cup.
“Maybe because of the last two championships, naging stagnant 'yung performance namin and I told them na we have to learn our lesson. Dahil next season, it will be a different ballgame,” sabi ni Austria. “Medyo naging kampante ang team. They thought na talent alone will give us the grand slam. I keep on telling them na we have to work hard,” dagdag pa ng hinirang na 2017 PBA Press Corps Coach of the Year.
Ang 2017 PBA Governor's Cup ay muling pinagharian ng Ginebra sa ikalawang sunod na pagkakataon nang igupo ang Meralco sa kanilang Finals rematch na umabot sa Game Seven.
“It’s just one of those nights,” sabi naman ni two-time PBA Grand Slam champion coach Tim Cone sa pagsibak ng kanyang Gin Kings sa Beermen sa quarterfinals. “It came at a bad time for them and we were on our game.”
Nahulog ang tropa ni Austria sa 'twice-to-beat' disadvantage sa quarterfinals matapos isuko ang itinayong 18-point lead at matalo sa Bolts.
Matapos ang pagkakatalsik sa torneo ay kaagad humingi ng paumanhin ang mga San Miguel players sa kanilang mga fans habang pinasalamatan naman ni veteran point guard Alex Cabagnot ang solidong suportang ibinigay ng kanilang mga fans sa buong season.
“We could have gone 0 for 3, but God blessed us with 2 championships. Thank you for the love, see y'all next year,” sabi ni Cabagnot sa kanyang Twitter account.
Sa 43rd season ng PBA ay sisikapin ng Beermen na makamit ang kanilang ikaapat na sunod na korona ng Philippine Cup at kung maaari ay ang Grand Slam.
“Puwede kaming makabuo ng history ulit, four straight na All Filipino conference titles," sabi ni four-time PBA Most Valuable Player June Mar Fajardo.
Sinabi naman ni Austria na marami siyang babaguhin sa ugali at paglalaro ng mga Beermen sa 43rd Season.
“We want to improve a lot and change strategy, change game plan, and change the training, and still, I believe this team can win another championship through hard work,” wika ni Austria.
Inaasahang malaki ang maitutulong ni Fil-German center Christian Standhardinger, ang hinirang na No. 1 overall pick ng nakaraang 2017 PBA Rookie Draft, sa hangarin ng San Miguel.
Ngunit sa Mayo ng 2018 pa posibleng makita sa bench ng Beermen ang 28-anyos na si Standhardinger o sa kalagitnaan ng 2018 PBA Commissioner's Cup.
Ito ay dahil sa nauna niyang pagpirma sa six-month contract para sa Hong Kong team sa ASEAN Basketball League.
“Right now, siguro kailangan naming maglaro as a team hanggang makapaglaro na si Standhardinger sa PBA Commissioner's Cup,” ani Austria.
Sa pagtatapos ng 42nd season ay pumagitna ang isyu kay Narvasa, inendorso ng majority block, sa PBA Board na huwag nang bigyan ng panibagong termino bilang PBA Commissioner.
Sa pagbubukas ng 43rd season noong Disyembre 17 ay isinumite ni Narvasa ang kanyang resignation letter kay Ricky Vargas ng TNT Katropa, ang bagong PBA chairman.
Nanatili si Narvasa sa kanyang puwesto hanggang kahapon bago niya ipasa ang trabaho kay media bureau chief Willie Marcial na iniluklok ng PBA Board bilang OIC hanggang makahanap ng bagong PBA Commissioner.
- Latest