Star pasok na sa q’finals
MANILA, Philippines - Halos ibaba sa sahig ni import Tony Mitchell ang backboard nang isalpak ang kanyang slam dunk sa huling 1:44 minuto ng fourth quarter, habang nagsalpak naman si combo guard Paul Lee ng mahahalagang basket.
Ito ang sinandalan ng Star para talunin ang nagdedepensang Rain or Shine, 99-93 at angkinin ang ikatlong quarterfinals berth sa 2017 PBA Commissioner's Cup kagabi sa Batangas City Coliseum.
Nagtala si Lee ng 23 points, 5 assists at 4 rebounds, habang may 21 markers si Mitchell para akayin ang Star (6-2) sa eight-team quarterfinals cast kasama ang Meralco (7-1) at TNT Katropa (6-2).
Pinamunuan naman ni import Shawn Taggart ang Rain or Shine, nalasap ang ikalawang dikit na kabiguan, para sa kanilang 4-4 marka.
Naitabla ni Jeff Chan ang Elasto Painters sa 90-90 mula sa kanyang dalawang free throws sa huling 2:55 minuto sa fourth quarter na sinundan ng isang fade away jumper ni Lee at banked shot ni Rafi Reavies para sa 94-90 abante ng Hotshots.
Nakumpleto naman ni Mitchell ang isang three-point play na tinampukan ng kanyang dumadagundong na slam dunk na nagpababa sa backboard sa huling 1:44 minuto ng labanan para sa 97-90 kalamangan ng Hotshots.
Sa kabilang banda, ireretiro ng Alaska ang No. 30 jersey ni 16-year veteran Eric Menk sa kanilang pagharap sa Barangay Ginebra ngayong alas-6:45 ng gabi sa Smart Araneta Coliseum.
Kumuha ang 42-anyos na si Menk, tinaguriang 'Major Pain', ng apat na PBA championships noong 2004 at 2008 Fiesta Cup at 2005 at 2007 Philippine Cup para sa Gin Kings.
Samantala, kinuha ng NLEX sina Larry Fonacier at JR Quiñahan buhat sa TNT Katropa at Globalport, ayon sa pagkakasunod, sa trade deals na inaprubahan ni PBA Commissioner Chito Narvasa.
Sina Fonacier, kilalang outside sniper at Quiñahan ay dating mga players ni coach Yeng Guiao sa Red Bull Barako at Rain or Shine.
Para mahugot ng Road Warriors sina Fonacier at Quiñahan mula sa Tropang Texters at Batang Pier ay kinailangan ni Guiao na bitawan sina small forward Sean Anthony, big man Bradwyn Guinto at point guard Garvo Lanete.
Star 99 - Lee 23, Mitchell 21, Barroca 11, Melton 9, Simon 8, Dela Rosa 8, Reavis 8, Sangalang 7, Mendoza 2, Javier 2, Brondial 0.
Rain or Shine 93 - Taggart 20, Chan 20, Norwood 10, Belga 10, Tiu 8, Yap 5, Ahanmisi 5, Cruz 5, Washington 4, Maiquez 3, Ponferada 3, Tolomia 0.
Quarterscores: 21-18; 48-41; 81-73; 99-93.
- Latest
