Nueva Ecijano cyclist sumikwat ng 2 ginto
Quirino, Erediano umeksena rin
TAGUM, Davao del Norte, Philippines – Inangkin ni Joseff Miguel Quirino ng Malaybalay, Bukidnon ang unang inilatag na gintong medalya sa 2016 Batang Pinoy National Championships kahapon sa Davao del Norte Sports Complex dito.
Nagsumite ang 13-anyos na si Quirino ng bilis na 10 minuto para kunin ang gold medal sa boys’ 10-14 years old sa criterium event ng cycling competition.
“First time ko lang po sumali rito sa Batang Pinoy kaya nagpapasalamat ako sa Panginoon na maganda ang natapos ko,” sabi ng Grade 7 student ng San Isidro College.
Ang ikalawang gold medal ay nakamit ni Moira Francis Erediano ng Cebu Province sa girls’ 10-13 years old class sa kanyang oras na 11.40.
Hinirang naman ang tubong Nueva Ecija na si Genisis Marana, pinsan nina dating Marlboro Tour veterans Ariel at Dominador Marana, bilang unang double-gold medal winner nang pagreynahan ang girls’ 14-15 at 16-17 years old category sa kanyang mga tiyempong 14.34 at 23.30, ayon sa pagkakasunod.
Binuksan na rin kahapon ang mga eliminasyon sa archery, arnis, badminton, baseball, basketball (3-on-3), boxing, chess, judo, karatedo, lawn tennis, pencak silat, sepak takraw, softball, table tennis, volleyball.
Samantala, kabuuang 13 ginto ang paglalabanan sa Day One ng athletics event ngayong araw.
Ang mga ito ay sa boys’ 16-17 yrs old 500-meter run, shot put, 2,000m walk at 1,500m run, boys’ 13-15 yrs old high jump, long jump at 1,500m run, girls’ 13-15 yrs old long jump, shot put at 1,500m run at girls’ 16-17 yrs old 2,000m walk, high jump at 1,500m run.
Nakatakda ring simulan ang mga labanan sa cycling (BMX/MTB), dancesport, triathlon, weightlifting at wrestling sa nasabing sports event para sa mga batang may edad 17-anyos pababa na umaasang makakasama sa national training pool.
- Latest
