Reyes kampeon sa One Pocket Invitational
MANILA, Philippines – Naibulsa ni legendary cue master Efren ‘Bata’ Reyes ang kanyang unang korona sa taong ito matapos pagharian ang Accu-Stats One Pocket Invitational Tournament na ginanap sa Simonis Arena sa Edison, New Jersey sa USA.
Itinarak ng dating World Pool 9-Ball Championship winner na si Reyes ang pukpukang 4-3 panalo laban sa Amerikanong si Shane Van Boening sa kanilang best-of-seven championship showdown.
Maagang inilatag ni Reyes ang kanyang tikas nang kubrahin nito ang 3-1 kalamangan sa pagsisimula ng bakbakan.
Ilang krusyal na mintis ang nagawa ng tinaguriang ‘The Magician’ sa mga sumunod na laro dahilan upang makalapit ang Amerikano at maitabla ang iskor sa 3-3.
Ngunit muling lumabas ang malalim na karanasan ni Reyes sa deciding Game 7 matapos ipamalas ang suwabeng pagtumbok at impresibong ball placings upang tuluyang angkinin ang panalo.
Napasakamay ni Reyes ang $5,000 premyo habang nagkasya sa $4,000 konsolasyon si Boening.
Umusad sa finals si Reyes matapos magtala ng 4-1 rekord sa eliminasyon.
Kabilang sa mga tinalo ni Reyes sa eliminasyon sina Danny Smith (4-2), Tony Chohan (3-1), Jeremy Jones (3-0) at Boening (4-2) habang ang kanyang nag-iisang kabiguan ay laban sa kababayang si Alex Pagulayan (3-4).
Nagtapos lamang sa ikalimang puwesto si Pagulayan na may 1-4 marka sa eliminasyon.
- Latest
