Babysitter, higit pa sa ‘monster’ ang nakita sa ilalim ng kama ng inaalagaang bata!

ISANG nakakagimbal na insidente ang naganap sa isang residential area sa Kansas City, U.S. kung saan isang babysitter na sinisigurado lamang na walang “monster” sa kuwarto ng inaalagaang bata, ay nakatagpo ng isang tunay na banta sa ilalim ng kama!

Ayon sa ulat ng Barton County Sheriff’s Office, naganap ang insidente sa isang bahay malapit sa Great Bend, Kansas, kung saan nag-alala ang isang bata tungkol sa presensiya ng isang “monster” sa ilalim ng kama nito.

Upang mawala ang takot ng bata at ipakitang imahinasyon lang ito, sumilip ang babysitter sa ilalim ng kama, ngunit hindi inaasahan, isang lalaki ang naroon at nagtatago.

Ang lalaki, na nakilalang si Martin Villalobos Jr., 27, ay dating residente ng naturang bahay, ngunit hindi na pinapayagang pumasok doon dahil sa isang protection from abuse order na inilabas laban sa kanya.

Sa kabila ng pagbabawal na manatili sa nasabing property, tumakas ang lalaki matapos ang isang matin­ding alitan sa pagitan nila ng babysitter.

Ang insidente ay nagresulta sa isang minor accident nang maitulak ang bata habang nagtatalo ang babysitter at ang lalaki.

Ayon sa sheriff’s office, agad na dumating ang mga awtoridad sa lugar bandang 10:30 ng gabi matapos makatanggap ng tawag ukol sa kaguluhan, ngunit nang makarating sila, wala na ang suspek.

Ang mga awtoridad ay nagsagawa ng operasyon upang mahuli ang suspek, subalit hindi nila ito natagpuan. Kinabukasan, muling namataan si Villalobos sa lugar kaya nagsi­mula ng isang mabilisang pagtugis dito. Sa kabila ng kanyang pagtatangka na magtago, nahuli rin siya matapos ang isang maikling habulan.

Matapos ang kanyang pagkakahuli, inihain sa kanya ang mga seryosong kaso, kabilang ang aggravated kidnapping, aggravated burglary, child endangerment, aggravated battery, at obstruction of justice. Pinatawan din siya ng paglabag sa protection order.

Matapos ang pagkakahuli sa suspek, isang hukom ang naglabas ng utos na ang suspek ay manatili sa bilangguan ng walang bail.

Sa ngayon, ang suspek ay nakakulong sa Barton County Jail at nakatakdang sumailalim sa mga karagdagang kaso. Ang bond na itinakda sa kanya ay umaabot sa $500,000.

Ang insidenteng ito ay nagsilbing babala sa mga taga-Kansas City na mag-ingat sa mga taong nasa kanilang pa­ligid at laging tiyakin ang kaligtasan ng kanilang mga anak.

Hanggang ngayon, hindi pa malinaw kung nakipag-ugnayan na ang suspek sa isang abogado, ngunit ang mga kasong isinampa laban sa kanya ay tiyak magdudulot ng mas mabigat na parusa sa mga susunod na buwan.