EDITORYAL — Nagbebenta at bumibili ng fake receipts, kasuhan

NOON pa marami nang establisimento o mga negosyo na nag-iisyu ng pekeng resibo. At siyempre matagal na ring panahon na nag-o-operate ang mga nag-iimprenta ng pekeng resibo. Hindi magtatagal sa gawaing ito ang mga gumagawa ng pekeng resibo kung hindi sila tinatangkilik ng mga kompanyang nandaraya sa buwis. Nabubuhay ang namemeke ng resibo dahil din sa mga mandarayang may-ari ng establisimento. Pareho sila nakikinabang sa isa’t isa. Patayin ang isa sa kanila at tapos na ang negosyo. Sa pag-iisyu ng pekeng resibo nawawalan ng P25.5 bilyon taun-taon ang pamahalaan. Napakalaking halaga na malaki ang maitutulong sa pagbibigay ng serbisyo sa mga tao at ganundin sa pagpapagawa ng mga school, kalsada at tulay na mahalaga sa pag-unlad ng bansa.

Ang pag-iisyu ng pekeng resibo ay matagal nang ginagawa ito subalit ngayon lang napagtuunan ng Bureau of Internal Revenue (BIR) sa pamumuno ni Commissioner Romeo D. Lumagui Jr. Sabi ni Lumagui, sinampahan na nila ng kaso sa pamamagitan ng Department of Justice ang apat na “ghost” corporations na nagbebenta ng pekeng resibo.

Tinukoy ni Lumagui ang mga kompanyang Buildforce Trading, Inc., Crazykitchen Foodtrade Corp., Decarich Supertrade, Inc., at Redington Corp. Ayon kay Lumagui ang apat na kompanya ay walang totoong negosyo at talagang ang trabaho ay magbenta ng pekeng resibo sa mga nandaraya ring establisimento sa pagbabayad ng buwis. Sinampahan ang apat na kompanya sa paglabag sa Sections 254, 255, and 267 ng National Internal Revenue Code of 1997.

Nagbabala rin naman si Lumagui sa mga kompanyang gumagamit ng pekeng resibo na isasailalim sila sa audit at kapag napatunayan ay mahaharap sa mabigat na kaso. Mayroon na umano silang listahan ng mga kompanya na nag-isyu ng pekeng receipt sa kanilang mga customer. Hindi umano makalulusot sa batas ang mga kompanyang nandaraya sa buwis. Target ng BIR na makakolekta ngayong taon ng P2.6 trilyon.

Nasa tamang landas ang BIR sa pagsasampa ng kaso sa mga nagbebenta at nag-iisyu ng pekeng resibo. Nararapat din namang bantayan ng BIR ang kanilang mga tauhan na maghohokus-pokus sa mga pekeng resibo kapalit nang malaking pera.