EDITORYAL - Buwagin na ang PS-DBM

MARAMI nang kinasangkutang kaso ang Procurement Service of the Department of Budget­ and Management (PS-DBM) at panahon na para buwagin ang tanggapang ito upang hindi na madagdagan pa ang mga kontrobersiya. Malalagay sa kahi­hiyan ang pamahalaan dahil sa mga kinasasangkutan ng PS-DBM. Kapag binuwag ang departamentong ito, makakatipid pa ang pamahalaan. Ayon sa report, mas malaki pa ang budget ng PS-DBM kaysa ibang tanggapan ng gobyerno. Maari namang gawin ang procurement kahit wala ang tanggapang ito.

Unang lumutang ang kontrobersiya sa PS-DBM noong nakaraang taon dahil sa maanomalyang COVID supply contract na ini-award sa Pharmally Pharmaceutical Corporation sa halagang P42-bilyon sa kabila na ang capital ng kompanya ay P625,000 lamang. Nadiin ang dating executive director ng PS-DBM na si Lloyd Cristhopher Lao at Michael Yang, dating presidential economic adviser ni ex-President Duterte. Anim na Pharmally officials ang sinampahan ng kaso. Nagkaroon ng imbestigasyon ang Senado subalit nawalang parang bula ang kaso. Nakalaya ang mga opisyal ng PS-DBM at Pharmally na ikinulong ng Senado.

Sangkot din ang PS-DBM sa mga mamahaling laptop na kanilang binili para sa Department of Edu­cation (DepEd) na gagamitin ng mga guro para sa distant learning noong nakaraang taon. Nagkakaha­laga ng P2.4 bilyon ang mga laptops na ang bawat isa ay P58,300. Subalit natuklasan ng Commission on Audit (COA) na outdated na ang processors, mabagal mag-download at hindi uubra para sa online learning ang mga laptops.

Nabatid din ng COA na ang laptop ay nagkakahalaga lamang ng P35,046.50 bawat isa.

Pabor naman ang Senado na buwagin na ang PS-DBM. Sinabi ni Senate Minority leader Aquilino “Koko” Pimentel III na isang tagong departamento ang PS-DBM at hindi dumaraan sa kumpirmasyon ang mga pinuno nito. Bukod sa nakatago, lagi rin daw naghuhugas-kamay ang kalihim ng departamentong ito at ikinakaila ang mga tao niya kahit may mga nagawang kasalanan.

Hindi na dapat maulit pa ang mga kontrobersiya sa PS-DBM at maiiwasan lamang ito kung bubuwagin na ang tanggapang ito. Ngayon na ang tamang panahon.