On-line gambling salot sa kabataan
Iniutos na ni President Digong ang pagpapatigil nang tuluyan sa e-sabong, isang uri ng sugal na accessible sa internet at maaaring makapaglaro pati ang mga menor-de-edad.
Ang e-sabong ay isang uri ng on-line gambling na ang may-hawak ng lisensiya ay ang Pitmaster Live na pag-aari ni Atong Ang. Tiniyak naman ni Ang na susunod siya sa atas ng presidente ngunit sinabing aayusin niya ang mga problemang may kinalaman sa palaro sa pag-asang makapagbukas muli.
Ang nakikita kong problema kung kaya hindi katanggap-tanggap ang e-sabong ay pati mga kabataan ay maaaring makapaglaro. Sa mga regular na sugalan tulad ng casino at sabungan, maaaring pagbawalan ang menor-de- edad. Pero sa Internet, ang mga kabataan ang pinakamagaling. Anumang safeguard o firewall ang ilagay mo, tiyak na ito ay kayang-kaya nilang pasukin.
Delikado kapag nalulong ang isang kabataan. Malamang pati pangmatrikula at allowance niya ay itaya sa on-line gambling. Sabi ni Atong, sa loob ng panahong sarado ang e-sabong, pag-aaralan nila kung paano mareresolba ang mga isyu tungkol sa e-sabong para maging katanggap-tanggap ito.
Si DILG Secretary Ed Año ang nagrekomenda kay President Digong na ipatigil ang e-sabong. Pero ngayong papatapos na ang termino ni Digong, papaano kung ang susunod na presidente ay isang masugid na tumututol sa pagsusugal?
Hindi rin ako pabor sa sugal pero sa aking palagay, ang pinakamagandang paraan para ma-regulate ang mga nagsusugal sa e-sabong ay magtayo na lang ng mga betting arcades tulad ng e-bingo. Alisin na ito sa on-line na accessible para sa lahat. Sa ganyang paraan, maaaring magtakda ng age limit sa mga pumapasok na manlalaro.
- Latest