Vindication ni Leila de Lima namumuro
Alam nang marami na kalabang mortal ni President Duterte si Sen. Leila de Lima simula nang ang presidente ay mayor pa lang ng Davao City. Noon, si De Lima ay isang maalab na human rights lawyer at advocate na walang habas na kumalaban sa pag-iral ng mga extra-judicial killings sa Davao.
Nang mga panahong yaon, umiiral sa Davao ang tinatawag na DDS o Davao Death Squad na pumapatay sa lahat ng mga kriminal na sangkot sa droga na pinaniniwalaang galamay ni Duterte.
Kaya marami ang naniniwala na ang mga isinampang kaso laban kay De Lima ng rehimeng Duterte na may kinalaman din sa droga ay pakana lang ni Duterte para gumanti sa senadora. Dahil non-bailable ang kaso, nanatiling nakapiit si De Lima at napagkakaitan ng katarungan. Hanggang ngayon, walang promulgation na ibinababa ang hukuman.
Ngayong malapit nang matapos ang termino ni Duterte, isa-isa nang bumabaliktad ang mga tumestigo laban kay De Lima. Nauna ang drug Lord na si Kerwin Espinosa na nagsabing tinakot lang siya kaya tumestigo laban sa senadora.
Ngayon, nag-urong na rin ng kanyang testimonya laban kay De Lima si dating Bureau of Corrections OIC na si Rafael Ragos. Nakikita ko nang maliwanag na ang mga testigong ito ay napilitan lamang na idiin ang senadora dahil sa udyok ng administrasyong nanggagalaiti sa galit kay De Lima.
Sa harap ng mga pangyayaring ito, nakikita ko ang pagsikat ng araw kay De Lima na sa mahabang panahon ay biktima ng political persecution.
- Latest
