Nagbabagong anyo dahil sa urbanisasyon
LAKING-siyudad ako, sa Quezon City na panandalian naging capital ng bansa. Pero isang bloke lang mula sa bahay namin, sa gilid ng Santo Domingo Church at likod ng Quezon Boulevard, ay may palayan. Nasa kanto ng kuwadradong taniman ang kubo ng magsasaka. Sa tabi nu’n ang sabsaban ng kalabaw, na humihila ng araro. Anak ng magbubukid ang nagturo sa akin magpalipad ng saranggolang boka-boka.
Sa madaling-araw nauulinigan ang hiyaw ng kinakatay na baboy sa litsonan sa La Loma, kasunod ang busina ng tren sa Sampaloc na biyaheng timog, at ang alas-otso ng umagang sirena ng Manila City Hall.
Out of town na noon ang Pasig at Pateros, Rizal; o Valenzuela, Bulacan. At mahabang biyahe ang patungong Cavite o Pampanga. Ngayon Greater Manila na lahat ‘yan; isang matrapik na megalopolis.
Napakarikit ng Barili, Cebu nu’ng una kong pasyalan, 1973. Liblib na munisipyo sa tuktok ng bundok. Makapal ang fog mula takipsilim hanggang bukang-liwayway. Pastulan ng kambing, at gawaan ng sinelas mula sa balat nito. Ngayon siksikan na ang residential subdivisions at gusali sa magkabilang gilid ng malapad na highway.
Nu’ng una akong pumunta sa Pagasa Island, 1983, ipinasyal ako ng Marine captain. Namangha kami nang umakyat ng puno ang isang higanteng coconut crab, singlaki ng palanggana, sumipit ng bunga, at nang bumagsak ito at nabiyak, nilantakan niya. Pagbalik ko kasama ang captain na heneral na, 2004, parang siyudad na ang Pagasa. May munisipyo, barangay hall, eskuwelahan, kuryente mula solar panels, maraming bahay, cellular tower at pier ng mga pangisdang bangka.
Huwag sanang masira ng urbanisasyon ang marami pang magagandang pook: Pagudpud, Ilocos; Banawe, Ifugao; Coron, Palawan; Donsol, Sorsogon; Panglao, Bohol; Malaybalay, Bukidnon; atbp.
* * *
Makinig sa Sapol, Sabado, 8-10 ng umaga, DWIZ (882-AM).
- Latest
