2022, year of the Political Fanaticals
Sa buong buhay ko, ngayon ko lang nasaksihan ang ganitong grabeng pagkakahati ng bansa. Halos dinidiyos na ng kani-kanilang followers ang mga foremost presidential contenders na sina Ferdinand Bongbong Marcos at VP Leni Robredo. Ang mga panatikong tagasunod ay handang makipagpatayan sa pagtatanggol sa kanilang mga pambato.
Ang dalawang kampo ay nagbabatuhan ng masasakit na salita at akusasyon sa isa’t isa. Kung pahihintulutan akong bigyan ng pangalan ang ganitong uri ng pulitika, tatawagin ko itong fanatical politics. Hindi lang ang dalawang political figures ang nagtutunggali kundi pati ang taumbayan na sumusuporta sa kanila.
Sana huwag natin isara ang ating mga utak sa iisang kandidato. Wika nga, keep our option open at pag-aralan din nang malaliman ang ugali at kakayahan ng ibang kandidato sa pagka-pangulo.
Kung patuloy na iiral ang ganyang attitude ng maraming botante, delikado ang lagay ng bansa kahit sino ang magwagi kina Marcos at Robredo. Kawing-kawing at walang katapusang protesta na hadlang sa pag-unlad ng bansa ang sasalubong sa sino mang mananalong Presidente. Kaya naiisip ko na sa halip na pagpipilian ko sina Marcos at Robredo, mabuti pang iboto ang ibang kandidato na hindi naman magiging kuwestyonable kung ito’y maihahalal.
Dahil sa mga mararahas na salita ng maraming supporters ng dalawang kandidato, sina Marcos at Robredo ay nagmimistulang barbaro na nasa isang madugong pagtutunggali. Maaaring hindi nila kasalanan ito pero kagagawan ng ilang supporters na nag-aakalang mabuti ang kanilang ginagawa sa kani-kanilang pambato.
Isipin nawa nating mga botante na malamang sa malamang, hindi naman natin personal na kilala ang mga kandidato tulad ng pagkakilala natin sa ating mga kaibigan. Ang nakalulungkot, maraming pagkakaibigan ang nasisira dahil sa pagkakaiba ng kanilang napipiling kandidato.
- Latest