P3 milyong suhol sa rape victim ng konsehal ng Quezon
Nalathala sa Philippine STAR at iba pang major dailies ang pagkakaaresto ng mga elemento ng CIDG kay councilor Arnie Manuel Yulde sa akusasyong rape ng isang 18-anyos na dalaga. Si Yulde ay konsehal ng Lopez, Quezon. Pero the councilor will have his day in court. Dun na lang niya idepensa ang sarili at huwag nang manuhol sa kawawang biktima.
Matapang ang biktima na itinago sa pangalang Wena. Sinabi niya sa isang press conference na isang abogado ni Quezon Province Governor Danilo Suarez ang nag-alok sa kanya ng halagang P3 milyon kapalit ng pag-uurong niya ng demanda sa konsehal. “Hustisya ang kailangan ko, hindi pera,” aniya sa media.
Humarap sa media ang biktima kasama ang kanyang ina at legal counsel na si Atty. Fernando Cayago na kinatawan din ni Prof. De Guzman. Sinabi ni Rosario Tapiador, ina ng biktima, noong Setyembre 20, may pinapuntang abogado at dalawa pang tauhan si Suarez sa dati nilang tirahan sa Pasig City at kinausap sila para aregluhin na lang ang kaso at upang mapalaya na si Yulde.
Pinapipirma raw si Wena sa isang affidavit of desistance bagay na tinanggihan ng biktima at ina. Tauhan umano ni Suarez ang nagpunta sa bahay nila dahil sila ay sinamahan ni Marie na kumare ni Yulde at ng kinakasama nitong si Cynthia na kapatid niya.
Umapela naman ang biktima kay Suarez at sinabing: “Gusto ko pong umapela at manawagan kay Governor Suarez na huwag niyang pakialaman ang kasong isinampa ko laban kay Councilor Yulde na alam kong protektado niya dahil ang gusto ko, hustisya at hindi pera.”
Samantala, sinabi naman ni De Guzman na kung totoo ang sinasabing pakikialam ni Suarez ay puwede itong kasuhan ng kriminal at administratibo. Pinag-aaralan na ngayon ng mga abogado niya kung may sapat na basehan upang makasuhan ito sa Ombudsman.
- Latest