Digong, Teddy Boy kontra-pelo ba?
Magkasalungat ba ang paninindigan nina Presidente Duterte at Foreign Affairs Sec. Teddy Boy Locsin Jr. hinggil sa patuloy na pananaklaw ng China sa mga territorial waters ng Pilipinas sa West Philippine Sea?
Kamakailan lang, inihayag ng Pangulo na “kaibigan ng Pilipinas ang China” at iniiwasan niya na magkaroon ng madugong komprontasyon ang dalawang bansa. Sinabi pa niya na dahil siya ang “owner” ng pinagtatalunang karagatan, pinapayagan niya ang China na mangisda sa naturang territorial water na bahagi ng ating exclusive economic zone (EEZ).
Pero ilang buwan na ang lumipas sapul nang mag-deploy ng daan-daang maritime militia ang China sa Julian Felipe Reef at dahil dito, nagsimulang maghain ng sunud-sunod na diplomatic protests ang DFA laban sa China pero tila hindi nagpapatinag ang nabanggit na bansa.
Oo nga’t nabawasan ang bilang ng mga barko nito, pero naroroon pa rin ang ilang barko na tila sinasabing amin ang teritoryong ito. May insidente pa nga kamakailan na ang mismong barko ng Philippine Coast Guard na nagpapatrulya roon ay itinaboy ng mga puwersang Intsik.
Walang tigil sa kakapadala ng diplomatic protest ang DFA na di naman pinapansin ng China kaya sa kanyang twitter account, naging marahas na sa kanyang pananalita si Locsin. Aniya: “China my friend, I don’t know how to say this politely but...Get the F— out!”
Dapat yata si Presidente ang nagsasabi ng ganyang malaswang salita dahil he is the only one who can get away with it. Pero wala tayong naririnig ni kahit katiting na galit mula sa kanya kaugnay ng isyung ito.
Para sa akin, mas tama ang ginawa ni Teddy Boy. Kaya lang, ito ay indikasyon na magkaiba ang paninindigan ni Locsin kaysa Pangulo pagdating sa usapin ng China. Ang Cabinet secretaries ay alter ego ng Pangulo at hindi counter ego.
- Latest
