Community Pantry ‘di Communist Party
Nakapagtataka kung bakit binabansagang “komunista” ang mga organizers ng Community Pantry na ngayo’y nagsusulputan kung saan-saan. Ito ay inisyatibo ng mga mamamayan na nagdodonasyon ng mga gulay, itlog, delatang pagkain at iba pang pantawid-gutom. Inilalagay ang mga ito sa isang lugar upang ang mga mamamayan ay malayang kumuha ng libre ayon sa kanilang pangangailangan.
Maagap namang nagpahayag ang Malacañang na wala itong kautusan na i-red tag ang mga nagpapasimuno ng Community Pantry. Nilinaw pa ng Palasyo na hindi pipigilan ng pamahalaan ang operasyon ng mga Community Pantry.
Hindi kaya barado ng tutuli ang mga nagre-red tag, at ang dinig sa Community Pantry ay Communist Party? Kapuri-puri nga ang ginagawang pagtutulungan ng mga taumbayan sa gitna ng kinakaharap na pandemya at dapat itong suportahan at hikayatin ng pamahalaan.
Sa panahon ng krisis, maraming tao ang dumaranas ng gutom. Hindi naman sapat ang ayudang ipinagkakaloob ng pamahalaan. Bakit dapat pigilin ng gobyerno ang pagtutulungan ng mga mamamayan para sa bawat isa?
Kung sino man ang may pakana na isailalim sa surveillance ang mga organizer nito ay tunay na kalaban ng administrasyon. Sinisiraan nila mismo si Presidente Duterte. Sa social media, katakutakot na batikos ang ipinupukol sa pamahalaan. Lumilitaw kasi na nagagalit ito sa tangka ng ilan na palabasing walang nagagawa ang gobyerno sa kapakanan ng mamamayan.
Sa nangyayaring paglutang ng diwa ng bayanihan, naalala ko ang isang mahalagang sinabi ni yumaong Pangulong John F. Kennedy ng US. “Ask not what your country can do for you but what you can do for your countrya.”
- Latest