EDITORYAL - Maging alerto sa bird flu
Inihayag ng Department of Health (DOH) noong Lunes ang tungkol sa bird flu na naipapasa sa tao. Naalarma kasi ang DOH sa ipinabatid ng World Health Organization (WHO) na pitong poultry farm workers sa Southern Russia ang tinamaan ng bird flu bagama’t hindi naman daw seryoso ang sakit. Nakuha umano ang bird flu sa mga inaalagaang manok makaraang malanghap ang dumi ng mga ito. Pinaniniwalaan din na hindi naging maingat sa paghawak sa mga maysakit na manok ang dahilan kaya naipapasa ang sakit sa tao.
Karaniwang mga bansa sa Asia ang apektado ng bird flu. Unang naitala ang kaso ng bird flu na naipasa sa tao noong 1993 sa Hong Kong. Lumaganap din ang bird flu sa China at Vietnam.
Noong Hulyo 2005, nakita ang unang kaso ng bird flu sa bansa sa isang maliit na manukan sa Calumpit, Bulacan. Gayunman, hindi mapanganib sa tao ang nasabing strain ng bird flu. Pinaniniwalaan din na ang naghatid ng bird flu sa bansa ay ang mga migratory bird na taun-taon ay lumilipat dito para tumakas sa grabeng lamig. Naipapasa umano ng migratory birds ang sakit sa mga manok at iba pang ibon.
Isa pa sa posibleng paraan para makapasok sa bansa ang bird flu ay dahil sa mga smuggled na karneng manok na karamihan ay galing sa China. Talamak ang smuggling ng karneng baboy at manok kaya dapat maging alerto ang Bureau of Customs at Department of Agriculture.
Ayon sa DOH, ang mga sintomas ng bird flu ay lagnat, ubo, pananakit ng lalamunan, pananakit ng tiyan at mga kalamnan, pagduduwal, pagtatae at pagsusuka.
Sunud-sunod na sakit ang mga tumatama ngayon sa buong mundo kasama na ang Pilipinas. Hindi pa nakaaahon sa mapaminsalang COVID-19, ay ito namang bird flu ang nakaambang manalasa. Pati na ang African Swine Fever (ASF) ay nasa bansa na rin at apektado ang mga baboy dahilan para magtaas ang presyo ng karne.
Nararapat na maging alerto ang kinauukulan sa bird flu para hindi makapasok sa bansa at kumalat. Hindi dapat maging kampante lalo pa nga at nakikipaglaban pa sa pesteng COVID na lumumpo na sa ekonomiya.
- Latest