Consumers, ingat sa endorsement ng vloggers
Kinasuhan ng Bureau of Immigration ang isang Taiwanese na nagngangalang Winnie Wong ng paglabag sa Immigration Laws at kawalan ng permit para magtrabaho sa bansa. Kilala si Wong bilang vlogger at influencer sa Pilipinas. Gamit niya ang alyas na Penelope Pop. Sa kanyang pagiging tanyag, nakakuha ito ng maraming endorsement projects mula sa kilalang brands sa bansa.
Nagkipagsosyo umano siya sa isang bantog na aktres para mag-manufacture at mag endorse ng pabango at iba pang cosmetic products, pero walang permit mula sa Food and Drug Administration.
Nabuking ng FDA ang operasyon kaya nagpalabas ng warning ang ahesya laban sa ibinibenta nilang pabangong Pouf! Bukod sa walang lisensya, napag-alaman pa na posible itong nagtataglay ng delikadong sangkap at iba pang “heavy metals.”
Mismong si Immigration Special Prosecutor Emmanuel Anthony Vera Jr, ang nagsampa ng deportation case kay Wong. Wala rin siyang permiso na magbenta ng cosmetics at walang lisensya mula FDA.
Pero bakit hanggang ngayon, ang FDA ay hindi pa rin kinakasuhan si Wong. Isa pa, bakit nananahimik ang Department of Trade and Industry? ‘Di ba’t trabaho nila na pangalagaan ang kapakanan ng mga ordinayong konsumer, lalo na sa mga tinaguriang influencers na inaabuso ang kasikatan?
Huwag sanang palampasin ng mga awrtoridad ang ganitong klase ng panloloko.
- Latest