Moment of Truth
Kahapon ay natuloy na ang Presidential Elections sa Amerika. Sa ilang araw ay magkakaalaman na kung ang kontrobersiyal na si President Donald Trump ay reregaluhan pa ng mga kano ng sariwang 4 year term. Kahit ano pang sabihin at sino pa man ang katunggali, itong 2020 election ay referendum ng mga Amerikano sa liderato ng kanilang Pangulo.
Araw pa ang bibilangin dahil marami-raming botante ang bumoto sa paraan ng pag-mail-in ng kanilang balota, Ngayong panahon ng pandemya, maraming mamamayan na umiwas sa pagbotong personal sa araw ng halalan. Sa mga Estado, tatanggap ang kanilang COMELEC ng boto sa mail basta kita sa tatak ng post office na hanggang Nobyembre 3 rin ito naipadala. Kapag Nobyembre 4 o lampas pa ang post mark ay hindi na papayagan.
Tinatayang magiging mahigpit muli ang labanan kung kaya hindi mauulit ang mga nakasanayan dating mapayapang transition. Itong tensiyon sa halalan ay dadagdag sa nakalatag nang tensyon sa lipunan sa mga nangyayaring diskriminasyon sa mga kapatid nating African-American at sa mga paghigpit sa mga immigrant mula sa iba’t ibang bansa.
Kung kaya hindi lang normal na alitan ang inaasahan ng mga negosyo sa mga komunidad. Ang mga pinakitang lakas o puwersa ng marchers sa mga protesta – sa isang panig ay iyong mga pumalag sa Black Lives Matter protest at sa kabila naman ang mga loyalist ni President Trump or mga nananalig na ang Amerika ay maihubog sa anyong nagugustuhan – ay malamang lamang maging mitsa ng higit na malalang lamat sa lipunan.
Kaliwa’t kanan ay pinagpaplanuhan na ang mga worst case scenario. Ang dasal ng marami ay sana’y magkaroon ng malinaw na trend ang resulta ng eleksyon – kesyo kay Trump or sa kalaban niyang si Vice President Biden – nang mas madaling matanggap ng madla na ang pasya ng nakararami ay karapat dapat sundan.
- Latest