EDITORYAL - Mega task force vs corruption
Isang mega task force na mag-iimbestiga sa mga katiwalian sa buong pamahalaan ang pinabubuo ni President Duterte kay Justice Sec. Menardo Guevarra. Iniutos ng Presidente na imbestigahan lahat ang mga tanggapan ng gobyerno na sangkot sa corruption. Walang exception sa gagawing imbestigasyon.
Unang ipinag-utos ng Presidente kay Guevarra na imbestigahan ang Philippine Health Insurance Corporation (PhilHealth) at pati na rin sa Department of Public Works and Highways (DPWH). Inulit naman ng Presidente ang pagsuporta kay DOH Sec. Duque at DPWH Mark Villar.
Sinabi pa ng Presidente na asahan nang mayroon siyang sususpendihing opisyal at personnel sa mga darating na araw. Kapag daw may sinuspende siyang opisyal, ibig sabihin nun e duda siya. Hindi raw siya magsususpende kung walang kasalanan ang opisyal o empleyado.
Ang mega task force na bubuuin ay tatagal hanggang Hunyo 30, 2022 o mas matagal pa maliban na lamang daw kung buwagin ito ng papalit sa kanya.
Hindi lamang mga opisyal ng tanggapan ang sakop para imbestigahan ng mega task force, pati raw mga kongresista at senador ay kasali rito. Sabi ni Presidential Spokesman Harry Roque na mandato ng Department of Justice (DOJ) na imbestigahan ang lahat kahit ang mga nasa lehislatura. Kahit daw may immunity ang mga mambabatas, hindi kasama ang paglabag sa anti-graft laws. Ang isang tiyak, basta nangurakot ang kongresista at senador, iimbestigahan ito ng DOJ.
Malawak ang sakop ng gagawing pag-iimbestiga ng DOJ. Pati mga mambabatas ay kasama. Kung magkakatotoo ito, maraming mambabatas ang tiyak na masasampolan ng DOJ. Maraming sangkot sa katiwalian gaya nang paglustay sa pondo ng PDAF na pinadaan sa bogus NGOs ni Janet Lim Napoles ilang taon na ang nakararaan.
Kung magtatagumpay ang task force ng DOJ laban sa mga korap sa buong pamahalaan kasama na ang mga mambabatas, tagumpay ito ng taumbayan. Maraming matutuwa sapagkat sagad na sa buto ang nangyayaring katiwalian sa pamahalaan. Dahil sa katiwalian, nauubos ang pera ng bayan na dapat ay gamitin sa pagpapaunlad at pagbibigay ng serbisyo sa taumbayan.
- Latest