COVID sa Pinas bumababa na
MARAHIL kung ang pamahalaan ang maghahayag ng balita, ito ay puwedeng pagdudahan ng mamamayan at sabihing “self-serving. Pero ang nagsasabi mismo na humuhupa na ang kaso ng COVID-19 sa bansa ay isang indipindiyenteng grupo ng mga mananaliksik na ang tawag ay OCTA Research team.
Pero kung duda pa rin tayo ay bigyan natin ng benefit of the doubt para kahit bahagya man ay mabuhayan tayo ng pag-asa na matatapos din ang pandemyang dinaranas natin at ng buong daigdig.
At bago naman tayo maging kampante kasunod ng magandang balitang ito, may itinatagubilin ang mga researcher. Iyan ang pagpapatupad ng mas estriktong quarantine measures sa ilan pang piling lugar sa bansa na ‘di pa masyadong kontrolado ang pandemya.
Sabi ng research group, bagama’t may naitatala pang bagong kaso ng COVID-19, kapansin-pansin naman na malaki ang pagbaba ng mga kaso. Ibig sabihin, bumabagal ang reproductive rate ng virus sa buong bansa pati na sa Metro Manila na siyang naging epicenter ng pandemya. Ito ay nasa 2,500 na lang kada araw sa buong bansa at 1,000 na lang kada araw sa Metro Manila.
Ngunit nilinaw naman ng mga mananaliksik na posibleng tumaas muli ang growth rate ng COVID kung magpapabaya tayo. Hindi ito irreversible. Kailangan pa rin mag-effort ang pamahalaan at mamamayan para masustine ang downward trend na ito ng sakit hanggang sa tuluyang maglaho.
Magandang balita ito dahil kailangang makabalik sa normal ang galaw ng mga mamamayan at negosyo alang-alang sa kaunlaran ng ating bansa.
- Latest
