Parang awa n’yo na, itigil na ang corruption!
SANA makonsensya na ang mga mandarambong sa gobyerno ngayong lugmok na lugmok na ang kalagayan ng ating ekonomiya. Kahapon, napaksa natin ang nabulgar na katiwaliang umaabot sa halagang Php 15 billion sa Philippine Health Insurance Corporation (PhilHealth) na naging dahilan ng pagkabangkarote ng naturang ahensya.
Biktima riyan ang mga milyun-milyong Pilipino na umaasang matutulungan ng PhilHealth sa panahong kailangan nila ng medical care at assistance, lalu na sa panahong ito ng pandemic.
Nababahala ang Malacañang sa teribleng recession o pagbagsak ng ating ekonomiya dahil sa ipinatutupad na lockdown, dahilan upang maparalisa ang mga negosyo. Walang trabaho sa mga mamamayan, walang revenue na kikitahin ang gobyerno dahil wala ring kinikita ang mga negosyo.
Nagsimula ang pagsadsad ng ekomiya o recession sa second quarter ng taong ito. Iyan ay nung magsimulang atakihin ng COVID pandemic ang ating bansa at nilimitahan ng pamahalaan ang galaw ng mga tao na nakaapekto pati sa operasyon ng mga negosyo. Nahigitan pa ng Pilipinas ang economic recession na dinaranas din ng ating mga kalapit na bansa sa Asya gaya ng Indonesia, Thailand, Singapore, Hong Kong and Malaysia.
Nauunawaan natin na may global pandemic kaya hindi maiiwasan ang recession. Kahit ang mga pinakamaunlad na bansa ay nagiging biktima.
Ngunit ang manguna tayo sa pinakamalubha ang situwasyon ay nakagagalit lalo pa’t iisiping marami pa ring mga opisyal sa gobyerno ang nagsasamantala at nagpapataba ng bulsa sa panahong ito ng krisis.
- Latest