Alupihan (80)
DALA ni Cris ang damit na naiwan ni Hani sa laundry area at ibibigay dito. Pero pag-akyat niya, eksaktong nakita niya ang pagpasok ni Gretchen sa room ni Diana. Hindi naman siya napansin ni Gretchen na para bang ingat na ingat sa pagtungo sa room ni Diana.
Ano kaya ang gagawin ni Gretchen doon?
Saglit na nag-isip si Cris.
Nagmuni-muni.
Naalala niya ang tagpo noon na nahuli niya ang mga ito sa isang hindi kaaya-ayang sitwasyon. May mahalay na ginagawa ang dalawa sa kama. Nakahiga si Diana at nasa harapan niya si Gretchen!
Ganundin kaya ang gagawin nila ngayon?
Napalunok muli si Cris.
Posibleng ganun uli. May oras sila para gawin iyon dahil Linggo ngayon at walang pasok.
O maaari namang magkukuwentuhan lang. Kahapon ay nakita niyang nagkukuwentuhan ang mga ito pero hindi niya tiyak kung siya o si Hani ang pinag-uusapan ng mga ito.
Hindi kasi niya ganap na naulinigan at saka wala namang pangalan na binanggit.
Ilang sandaling nag-isip si Cris.
Subukan kaya niyang silipin ang dalawa? Baka nakaawang uli ang pinto ng room ni Diana gaya noon.
Napabuntunghininga si Cris.
Nagtatalo ang loob niya. Alam niyang hindi maganda ang manilip. Nakakahiya kapag may nakahuli sa kanya habang nakasilip sa kuwarto. Kagalang-galang pa naman ang turing sa kanya.
Napabuntunghininga uli siya.
Nanaig ang sinasabi ng kanyang utak na silipin ang ginagawa ng dalawa.
Luminga-linga muna siya. Walang tao.
Humakbang siyang dahan-dahan patungo sa room ni Diana!
Gusto talaga niyang malaman ang nangyayari sa loob. Hindi niya kayang suwayin ang utos ng kanyang utak.
(Itutuloy)
- Latest
