EDITORYAL - ‘Krimen ng taon’
Humarap kahapon sa pagdinig ng Senado ang nagbitiw na opisyal ng Philippine Health Insurance Corporation (PhilHealth) at isiniwalat ang anomalya sa ahensiya na dahilan nang pagkalustay ng P15-bilyong pondo. Ayon kay Thorsson Montes Keith, dating anti-fraud legal officer ng PhilHealth, ang natuklasan niyang anomalya sa ahensiya ay maituturing na “krimen ng taon”. Mayroon aniyang sindikato sa PhilHealth na nagmamaniubra para maisakatuparan ang interim reimbursement mechanism at ang procurement ng “overpriced” information and communication equipment.
Ayon pa kay Keith, para mapagtakpan ang nawaldas na P15-bilyon, isinulong ng sindikato ang mandatory contributions ng overseas Filipino workers (OFWs) na una na niyang tinutulan noong nakaraang buwan. Siya rin ang kumuwestiyon sa overpriced na IT system na naging dahilan nang mainitang pagtatalo sa meeting at naging daan para siya at dalawang iba pang PhilHealth officials ay magbitiw. Kasama niyang nagbitiw si Bai Laborte, head executive assistant ni PhilHealth President and Chief Executive Officer Ricardo Morales. Ang iba pang dahilan nang pagbibitiw ni Keith ay ang hindi parehas na promosyon ng mga officer at atrasadong pagbibigay ng sahod at hazards pay. Pinabulaanan naman noon ni PhilHealth President/CEO Morales ang mga isiniwalat ni Keith.
Mabigat ang akusasyong ito at hindi dapat balewalain. Kapag PhilHealth ang pinag-uusapan nagdudulot ito ng pangamba sa maraming miyembro lalo pa’t ang bansa ay nasa panahon ng pandemia. Kailangang kalkalin pa ang mga siniwalat ni Keith para maisalba ang PhilHealth at hindi tuluyang matuyuan ng pondo ang ahensiya.
Lagi na lamang may kontrobersiya sa PhilHealth. Noong Mayo, maraming OFWs ang pumalag sa balak na puwersahang pagbabayad ng contributions. Sabi ng OFWs hindi na nila kailangan ang mandatory contributions sapagkat mayroon silang health insurance sa kompanya.
Noong 2018, naging kontrobersiya ang PhilHealth nang mabulgar ang “ghost dialysis” ng isang clinic sa Novaliches na kumukubra nang malaking halaga sa PhilHealth kahit patay na ang pasyente.
Busisiin ang sinasabing anomalya sa PhilHealth. Ang mamamayan ang kawawa kapag hindi ito nasawata.
- Latest
