Ayaw ilabas sa publiko ang impormasyon?
Sa New Bilibid Prisons naman ang mainit na isyu ngayon. Lumabas ang ulat na namatay na raw si Jaybee Sebastian, ang drug lord na tumestigo laban kay Sen. Leila de Lima ilang taon nang nakararaan. Namatay siya umano dahil sa COVID-19 kaya ayon kay BuCor Director Gerald Bantag, pina-cremate na ang bangkay nito ayon sa mga alituntunin hinggil sa mga namamatay dahil sa virus.
Pero lumabas kaagad ang mga espekulasyon dahil sa pagtanggi ni Bantag na ilabas ang impormasyon hinggil sa iba pang mga namatay sa NBP, dahil daw sa Data Privacy Act. Bakit nga ba ayaw ilabas ang mga pangalan na mga high-profile drug inmates pa?
Kaya naglabas ng pahayag si Privacy Commissioner Raymond Liboro na hindi dapat ginagamit ang Data Privacy Act para tanggihan ang publiko ng karapatan sa impormasyon, lalo na’t may mga isyu na sinusundan na ng publiko.
Alam nang lahat ang pagbigay ng testimonya ni Sebastian laban kay De Lima. May iba pa bang nagbigay ng testimonya laban sa senador na namatay na rin?
Kaya hindi maiwasang mag-isip ang marami na baka may anomalya sa loob ng NBP, na hindi rin malayong mangyari. Tinatanong nga ni Senate President Tito Sotto kung talagang namatay dahil wala nang paraan para malaman kung na-cremate na nga ang katawan. Wala nang fingerprints. Maaaring makakuha ng DNA mula sa mga abo pero mas mahirap ang proseso. Baka ginawan lang ng kuwento para makalabas at hindi na hanapin.
Hindi malayong mangyari at kailangang tandaan ang paglabas-labas ni Tony Leviste noon. May mga nagsasabi pa na ito nga ang kanilang “gantimpala” para sa pagbigay ng testimonya laban kay de Lima. Nakalaya na sila’t hindi na hahanapin ninuman dahil “patay” na nga. Dito nga nagalit si Bantag at hinamon na maglabas ng ebidensiya na kung ganun nga ang paniniwalang naganap.
Iniutos na rin ni DOJ Sec. Guevarra ang NBI na gumawa ng imbistigasyon. Nais rin mag-imbestiga ang Senado. Hindi raw puwedeng palampasin. Sana nga. Sana nga masinsinan at patas ang imbistigasyon. Ilabas na ang pangalan ng mga namatay. Pero kung noong Marso pa namatay umano ang iba, paano pa makukumpirma ang kanilang bangkay?
Hindi dapat ginawa ni Bantag ang hindi paglabas ng mga pangalan noong namatay na. Ito ang mahirap kapag mali ang interpretasyon ng batas, tulad ng Data Privacy Act. Ito ang mahirap kapag mali ang interpretasyon ng mga pulis mismo.
Lumalabas na hindi alam ni Bantag ang batas. Ito rin ang dahilan kung bakit marami ang nangangamba sa Anti-Terrorist Act. Baka maling interpetasyon ng mga pulis, nakakulong ka na kaagad.
- Latest