May magagawa pa ang may-ari ng ABS-CBN
Tila nagiging isang drama-serye na ang kapaitang naganap sa ABS-CBN. May mga bida’t kontrabida, kawawa at kinakawawa, depende kung anong gustong gampanang papel kasama na ang mga epal.
Sa kabilang banda, kung talagang pag-iisipan ng mga may-aring Lopez, may magagawa sila. Meron silang puwedeng gawin sa usaping ito ng prangkisa. Kung magagaling ang kanilang economic at marketing strategists, may mga paraan.
Puwede silang maghanap ng “partner” sa pamamagitan ng corporate restructuring. Ang tinutukoy ko, sa pamamagitan ng “merger” o “partnership”.
Tutal naman, may infrastructure na, may building, may mga equipment, teknolohiya, mga tao at mga artistang ang ilan sa kanila ay mapagmalaki, maiingay at malalaking ulo.
Maaari nilang gawing selling proposition ito sa kanilang magiging business partner, kung sino man ‘yan.
Tutal, prangkisa naman ang pinag-uusapan at sabi rin ng Kongreso na hindi karapat-dapat ang Lopez. Kung ganoon, eh di iba!
Alam ko, isang business tycoon na may-ari rin ng isang network ang TL na TL (tulo laway) diyan sa ABS-CBN.
Maraming mahahanap diyan na interesado’t mga bilyonaryo din at magbabayad pa ng tamang buwis. ‘Yung hindi na manggugulang.
Dito, masasalba pa ang mga kawawang maliliit na empleyado na ginagantso at walang kasalanan.
Kung talagang mahal at may malasakit ang may-ari sa mga empleyado, gagawa sila ng agarang hakbang.
Magaling naman ang ABS-CBN pagdating sa products, concepts at ideas, siguradong kaya nilang gawan ng hakbang ito.
Hindi pa naman huli ang lahat, may pag-asa at hindi kailangang umiyak na parang inagawan ng lollipop dahil may paraan.
Learn from it, ‘wag nang nakalimot doon sa responsibilidad at obligasyon na kaakibat ng prebilehiyo (hindi karapatan) na ipinagkaloob – ang prangkisa.
- Latest
