Video karera, nagkalat sa Pasay!
KINAMUMUHIAN ni Philippine National Police (PNP) chief Gen. Archie Gamboa ang video karera subalit may halos 30 na makina na nakalatag sa Bgy. Sto. Niño sa Pasay City. Nagtataka ang lahat kung bakit nakalusot ang mga makina sa kaalaman ng bata ni Gamboa na si Brig. Gen. Emmanuel Peralta, hepe ng Southern Police District. Si Peralta ay dating SEA ni Gamboa kaya napadpad s’ya sa SPD at na-promote naman. Kaya lang, mukhang hindi sinuklian ng trabaho ni Peralta ang pagmamahal sa kanya ni PNP chief. Dipugaaaa!
Ang mga makina ay nakalatag sa sakop ng PCP 6 ng Pasay police at todo bantay ang mga pulis dito imbes na labanan ang COVID-19. Kung sabagay, mga pulis din ang may-ari ng mga nakalatag na makina. Noong kasagsagan ng kampanya laban sa video karera na iniutos ni Gamboa bago ang COVID, sangkaterbang makina ang nakumpiska subalit itinago ng mga pulis ang iba, ‘di ba Capt. Pedroso, Pasay police intelligence chief Sir?
At habang nakatuon ang pansin ni Gamboa sa pakikibaka vs COVID, aba inilatag ng mga tiwaling pulis ang naitagong mga makina at nagtataka ang mga kosa ko kung bakit pinayagan ito ni Mayor Imelda Calixto-Rubino. Dipugaaaa! Makupad kumilos sa pag-ayuda ng kanyang constituents si Calixto-Rubino sa naapektuhan ng virus, lalo na sa SAP distribution kung saan kulelat siya, at pati sa illegal gambling mabagal din siyang umaksiyon? Ano ba ‘yan?
May alam kaya si Col. Ericson Dilag, hepe ng Pasay police sa mga nakalatag na makina? Kung sabagay, bagong upo pa lang sa trono si Dilag at mukhang nabulag din siya ng kanyang mga tauhan. Dipugaaaa!
Alam naman ng lahat na puro adik lang ang nagbababad sa mga makina. At kapag “high” na sila sa droga, maaaring hindi na paiiralin ang health protocol na social distancing at tiyak tataas ang bilang ng COVID positive sa Pasay at lagot si Mayor Calixto-Rubiano. Abangan!
- Latest