Brigada Eskwela sa Naga batok sa COVID-19
CEBU, Philippines — Nanawagan ang Department of Education (DepEd) City of Naga Division og mga donasyon alang sa kagamitan batok sa pagkuyanap sa coronavirus disease hulip sa naandan nga gamiton sa Brigada Eskwela.
Ang Brigada Eskwela usa ka kalihukan sa DepEd diin magtapok ang tanang stakeholders aron magtinabangay sa pag-andam sa mga publikong tunghaan sa pagbukas sa klase.
Matud ni Alexa Manna Chiong-Padron, division designate isip ducation Program Specialist in Social Mobilization, nga ang Brigada Eskwela naandan na ang pisikal nga pagpanglimpyo sa eskwelahan, pagpintal ug pag-ayo sa mga ginagmay nga guba.
Apan matud niya nga ubos sa New Normal, ang maong kalihukan dili na mahitabo.
Hinoon bisan sa kasamtangang sitwasyon sa Covid-19, ilang gipaneguro nga magpadayon ang pagkat-on sa mga tinun-an pinaagi sa Brigada Eskwela samtang nakigbatok sa kalibutanong pandemiya.
Matud niya nga ang pag-disinfect sa mga tunghaan ug paggamit sa mga gikinahanglan kaayo nga butang maoy ila karong tinguha sa DepEd ubos sa New Normal.
Aron matuman kini, matud ni Padron nga gikinahanglan nila ang mga thermal scanners, disinfectants, disposable surgical/face mask ug gloves, vitamins alang sa mga kawani sa DepEd, kabataaan ug mga information materials batok sa COVID-19.
“It would be of great help to our students and educators if they can donate anything related to the things mentioned,” dugang ni Padron. (BANATNEWS)
- Latest
